Bashkëshortja dhe djali i Urim Fikut kanë mohuar në Gjykatën e Dibrës se kanë lidhje me vrasjen e 61-vjeçarit, të ndodhur më 3 nëntor në fshatin Godvi të Bulqizës. Shqyrtimi i kërkesës për masën e sigurisë ndaj tyre po zgjat prej rreth dy orësh dhe seanca ende nuk ka përfunduar.
Informacionet nga salla e gjyqit bëjnë të ditur se Sadete Fiku dhe i biri, Gazmir Fiku, kanë kundërshtuar dyshimet për përfshirjen e tyre në krim, duke deklaruar se nuk e kanë vrarë ata dhe se nuk kanë lidhje me ngjarjen. Gjykata nuk ka dhënë ende vendim për masën e sigurisë. Arrestimi i Sadete Fikut, 57 vjeçe, dhe Gazmir Fikut, 33 vjeç, u njoftua nga policia një ditë pas ngjarjes, pasi të dy dyshohen për përfshirje në vrasjen e 61-vjeçarit.
Të lidhura
None found
Versioni i paraqitur fillimisht ishte se Urim Fiku kishte pësuar një sulm nga një ari. Megjithatë, ekzaminimi mjeko-ligjor në Tiranë konstatoi një plagë me armë zjarri në gjoksin e tij. Edhe dëmtimet e vërejtura në kokë i përforcuan dyshimet e policisë. Puna hetimore vazhdon për të sqaruar tërësisht rrethanat e ngjarjes.
Nga raportimet mësohet se familjarët e transportuan 61-vjeçarin drejt spitalit të Bulqizës, por ai mbërriti atje pa shenja jete. Ata kundërshtuan përgatitjen e trupit të pajetë nga stafi spitalor, duke thënë se do të kujdeseshin vetë për këtë proces, në përputhje me traditën e tyre.
