Donald Trump ndodhet në Nju Jork përpara paraqitjes së tij historike në gjykatë. Ish-presidenti amerikan mbërriti të hënën përpara paraqitjes së tij në gjykatë sot, ku do të akuzohet se i ka paguar 130,000 dollarë yllit porno Stormy Daniels për të blerë heshtjen e saj përpara zgjedhjeve presidenciale të 2016-ës.
Trump thotë se është “i pafajshëm” dhe në një postim në platformën “Truth Social” shkroi se ka udhëtuar në Nju Jork për ta bërë “Amerikën përsëri të madhe”, duke nënvizuar se ka qenë viktimë e një “gjuetie shtrigash” në një kohë kur vendi i tij po “shkon në ferr”.
Me manjatin republikan 76-vjeçar që po bën fushatë për një mandat të dytë në Shtëpinë e Bardhë në vitin 2024, ai është ish-presidenti i parë i SHBA që përballet me akuza penale.
Masat e sigurisë rreth Kullës Trump, ku u shemb ish-presidenti amerikan, janë drakoniane. Rreth 55 mijë policë janë vënë në gatishmëri, ndërsa rrugët përreth një gjykate në Manhattan janë bllokuar përpara paraqitjes së sotme të manjatit republikan.
Sipas një prej avokatëve të tij, Joe Tacopina, Donald Trump nuk do t’i kërkohet të mbajë pranga. Megjithatë, ai nuk do t’i shmanget procesit të pakëndshëm të konfirmimit të identitetit, marrjes së shenjave të gishtërinjve dhe fotografimit si i pandehur.
Para gjykatësit, Trump “do të deklarohet i pafajshëm” sepse “nuk ka vepër penale”, sipas avokatëve të tij mbrojtës. Ai më pas duhet të lirohet, ndoshta me kusht, në pritje të gjykimit të tij.
Ndërsa Donald Trump zbarkoi nga avioni i tij në Nju Jork, Presidenti i SHBA Joe Biden po vizitonte një fabrikë në Minesota për të lavdëruar politikën e tij ekonomike dhe për të premtuar “ditë më të mira” për punëtorët, duke shmangur komentet mbi procesin ligjor që ndiqet në lidhje me akuzat kundër paraardhësit të tij republikan. /albeu.com
