Ngjarjet e mbytjeve të regjistruara në vend, mes tyre edhe me fëmijë viktima, kanë rikthyer në fokus nevojën për më shumë siguri në plazhe. Specialistët kërkojnë forcim të masave mbrojtëse dhe shprehin shqetësim se në shumë plazhe publike ende mungojnë vrojtuesit dhe sinjalistika e domosdoshme.
Me nisjen e sezonit turistik, bregdeti shqiptar ka pritur një numër të lartë pushuesish, por paralelisht janë shënuar edhe raste fatale të mbytjeve.
Të lidhura
None found
Sekretarja e përgjithshme e Federatës Shqiptare të Vrojtuesve të Plazhit dhe Shpëtimit në Ujë, Eni Metaj, thekson se prania e vrojtuesve në plazh është thelbësore për të shmangur ngjarje të rënda.
Sipas saj, në sektorin privat situata paraqitet më e mirë, ndonëse vijon të mbetet problem sigurimi i pranisë së pandërprerë të vrojtuesve në vendin e punës përgjatë gjithë sezonit.
Më problematike, sipas Metajt, mbetet gjendja në plazhet publike, ku, referuar të dhënave të Federatës, në shumë raste mungojnë jo vetëm vrojtuesit, por edhe sinjalistika dhe pajisjet e nevojshme të shpëtimit.
Metaj u kërkon bashkive dhe institucioneve që administrojnë plazhet publike të ndërhyjnë menjëherë për të garantuar sigurinë e pushuesve.
Ajo u bën thirrje edhe qytetarëve që të frekuentojnë plazhe ku ofrohet shërbimi i vrojtimit, të zbatojnë sinjalistikën dhe të shmangin zonat pa mbikëqyrje, në mënyrë që gjatë sezonit veror të parandalohen tragjeditë.
