TIRANË- Kryetari i Gjykatës së Lartë, Sokol Sadushi, i është drejtuar Ministrisë së Financave me kërkesën për rikthimin e menjëhershëm të pagesave për gjyqtarët. Kërkesa vjen pasi pagesat janë bllokuar në sistemin e thesarit, për shkak të mosmarrëveshjeve lidhur me zbatimin e vendimit nr. 15, datë 17 shkurt 2026, të Gjykatës Kushtetuese.
Në shkresën dërguar ministrit të Financave, Petrit Malaj, me dijeni ministrin e Drejtësisë Toni Gogu dhe kryetarin e Këshillit të Lartë Gjyqësor, Ilir Rusi, Sadushi shprehet se mungesa e një ligji të ri të miratuar nga Kuvendi ose e fondeve të parashikuara në buxhet nuk mund të përdoret për të ndalur zbatimin e vendimit kushtetues.
Të lidhura
None found
Sipas Gjykatës së Lartë, vendimi nr. 15/2026 i ngarkonte Kuvendit detyrimin që deri më 31 korrik 2026 të miratonte ndryshimet e nevojshme ligjore. Pas përfundimit të këtij afati, formula e mëparshme e pagës së magjistratëve, sipas interpretimit të kësaj gjykate, nuk mund të vijonte të kishte efekte juridike.
Shkresa nënvizon se Gjykata Kushtetuese ka përcaktuar edhe pasojat që rrjedhin nga mosveprimi i Kuvendit. Në këtë rast, referenca është formula e pagës së funksionarëve të administratës së lartë publike, në përputhje me standardin e vendimit nr. 35/2022.
Gjykata e Lartë përmend edhe vendimin nr. 435, datë 26 gusht 2026, të Këshillit të Lartë Gjyqësor. Sipas saj, ky vendim nuk ka sjellë një politikë të re pagash, por ka përcaktuar në mënyrë konkrete zbatimin e detyrimit të vendosur nga Gjykata Kushtetuese.
Për periudhën që nis më 1 gusht 2026, paga referuese bazë është llogaritur duke marrë si bazë pagën për pozicion prej 222.425 lekësh dhe shtesën për nivelin e kualifikimit prej 14.000 lekësh. Në total, shuma arrin në 236.425 lekë.
Argumenti se pagat nuk mund të paguhen për shkak të mungesës së planifikimit buxhetor kundërshtohet nga Gjykata e Lartë. Në shkresë thuhet se fondet e nevojshme mund të sigurohen përmes mekanizmave që parashikon legjislacioni buxhetor, ndërsa detyrimi për zbatimin e vendimit kushtetues vazhdon të jetë në fuqi.
Ministrisë së Financave i kërkohet të zhbllokojë menjëherë pagesat mujore të gjyqtarëve.
Gjithashtu, kërkohet zbatimi i pagës referuese bazë duke nisur nga 1 gushti 2026.
Një tjetër kërkesë lidhet me alokimin e fondeve shtesë që mund të jenë të nevojshme për pagesat korrente.
Gjykata e Lartë kërkon edhe trajtimin e diferencave financiare për periudhën nga 1 prill 2023 deri më 31 korrik 2026, në përputhje me vendimin e KLGJ-së.
“Respektimi i vendimit të Gjykatës Kushtetuese nuk është çështje vullneti institucional, por detyrim kushtetues për çdo organ të Republikës”, thuhet në përfundim të shkresës së firmosur nga kryetari i Gjykatës së Lartë, Sokol Sadushi.
