Kryeministri Edi Rama ka reaguar në platformën “X” pas incidentit të ndodhur në New York, ku protestues shqiptarë i hodhën vezë gjatë vizitës së tij në SHBA.
Përmes mesazhit të tij, Rama iu kundërpërgjigj protestuesve me tone të ashpra, duke theksuar se veprime të tilla nuk do ta pengojnë të vijojë misionin e tij politik. Ai deklaroi se nuk do të tërhiqet përballë kritikave dhe protestave, pasi synimi mbetet integrimi i Shqipërisë në Bashkimin Europian.
Të lidhura
None found
Kryeministri e lidhi këtë proces me luftën kundër korrupsionit dhe reformën në drejtësi. Sipas tij, Shqipëria e sotme nuk është më vendi i së kaluarës, ndërsa sistemi institucional ka nisur të tregojë aftësi për vetëpastrim.
Rama tha se flamuri kombëtar është ngritur prej tij “më lart se ç’ka qenë ndonjëherë” në sytë e botës. Ai shtoi se nuk mund të ndalet nga balta, vezët apo “jargët” në përpjekjen për ta çuar flamurin shqiptar në “majën e Europës së Bashkuar”.
Ai u shpreh se krijimi i një sistemi institucional që lufton korrupsionin dhe zbaton barazinë para ligjit përbën, sipas tij, një arritje të rëndësishme të misionit të tij politik. Rama argumentoi se një vend i zhytur në korrupsion nuk do të kishte luftë frontale dhe rezultate konkrete kundër tij, ndërsa Shqipëria, në vlerësimin e tij, tashmë ka ndryshuar.
Kryeministri pretendoi gjithashtu se Bashkimi Europian e vlerëson gjithnjë e më shumë Shqipërinë për përpjekjet kundër korrupsionit. Në fund të reagimit, ai përdori epitete ironizuese për protestuesit dhe kritikët e tij, duke i cilësuar si “pula histerike të katundit tonë” që hedhin vezë në ajër në interes të “gjelave tallagjarë të pazarit politik e mediatik”.
Rama i akuzoi kundërshtarët se besojnë se mund ta mposhtin përmes akuzave të vazhdueshme për korrupsionin, për të cilin ai tha se po luftohet nga vetë sistemi që po ndërtohet, si edhe përmes sharjeve dhe mallkimeve. Ai ironizoi edhe mënyrën e shkrimit të njërit prej kritikëve, duke thënë se “e shkruan shqipen me këmbët e pulës”.
