Presidenti i Republikës, Bajram Begaj, priti sot në një takim zyrtar Kryetarin e Komitetit Ushtarak të NATO-s, Admiral Giuseppe Cavo Dragone, në vizitën e tij të parë në rajon që nga marrja e detyrës.
Presidenti Begaj e uroi Admiral Dragone për detyrën e re dhe e falënderoi për përzgjedhjen e Shqipërisë si destinacionin e parë në Ballkan. Në fjalën e tij, kreu i shtetit vlerësoi rolin jetik të Aleancës në ruajtjen e paqes dhe sigurisë në rajon, duke theksuar rëndësinë e prezencës së NATO-s në Ballkan dhe të misionit KFOR në Kosovë.
“Të jemi së bashku, të diskutojmë së bashku, të gjejmë zgjidhjet së bashku, sepse vetëm nëse jemi të unifikuar dhe bashkë, ne do të jemi më të fortë. Paqja dhe siguria janë dy fjalë magjike për rajonin tonë, në kohërat që po jetojmë,” u shpreh presidenti Begaj.
Duke folur për rëndësinë e mbështetjes ndaj Kosovës, presidenti theksoi domosdoshmërinë që ajo të jetë pjesë e organizatave ndërkombëtare dhe të rrisë bashkëpunimin me NATO-n dhe nismat rajonale.
Presidenti bëri gjithashtu të ditur se Shqipëria ka rritur buxhetin për mbrojtjen, ka vijuar modernizimin e Forcave të Armatosura dhe ka rritur angazhimin e saj në misionet e NATO-s. Ai vuri theksin edhe te investimet strategjike në infrastrukturë, si Korridori VIII dhe porti i ri i Porto Romanos, që sipas tij do të rrisin ndërlidhjen rajonale dhe lëvizshmërinë ushtarake.
