Ndalohet francezi në Kakavijë, nuk deklaroi 30 000 euro-t që kishte në zarf

Policia kufitare ka ndaluar një 62-vjeçar me origjinë nga Franca pasi lëvizte me mijëra euro të padeklaruara.

Ndalimi tij është bërë në Kakavijë ku 62-vjeçari me inicialet R.M, lëvizte me mjetin tip ‘Mercedes ML’ dhe kishte me vete në një zarf shumën prej 30000 euro, të cilat nuk i kishte deklaruar.

NJOFTIMI ZYRTAR:

Vijojnë kontrollet intensive për parandalimin, evidentimin dhe goditjen e paligjshmërisë.Goditet një rast i mosdeklarimit të të hollave në kufi.Sekuestrohen 30000 euro, procedohet penalisht një shtetas i huaj.

Shërbimet e Policisë Kufitare në Kakavijë, si rezultat i shtimit të kontrolleve me qëllim parandalimin dhe goditjen e paligjshmërisë, bazuar në analizën e riskut, në dalje të RSH-së, kanë kaluar në kontroll më të detajuar automjetin tip “Mercedez ML”, me drejtues shtetasin francez R. M., 62 vjeç, banues në Lion, Francë.

Gjatë kontrollit të ushtruar në automjet, shërbimet e Policisë Kufitare dhe shërbimet e FRONTEX-it, në bashkëpunim me shërbimet doganore, gjetën në bagazhin e mjetit, në një zarf letre 30000 euro, të cilat ky shtetas nuk i kishte deklaruar. Shuma e parave u sekuestrua në cilësinë e provës materiale.

Në përfundim të veprimeve të para të kryera nga specialistët e Seksionit për Hetimin e Krimit Ekonomik e Financiar në DVP Gjirokastër, shtetasi francez R. M. u procedua penalisht për veprat penale “Mosdeklarimi i të hollave dhe sendeve me vlerë në kufi” dhe “Pastrimi i produkteve të veprës penale ose veprimtarisë kriminale”. /albeu.com/

 


Shtuar 7.08.2021 10:05