Pas disa orësh qëndrese dhe ecjeje maratonë, u mbyll dita e 37-të rresht e protestës qytetare në kryeqytet, ndërsa kërkesa kryesore mbetet e pandryshuar: largimi i menjëhershëm i kryeministrit Edi Rama dhe rrëzimi i kabinetit qeveritar.
Fillimisht, Bulevardi “Dëshmorët e Kombit” u mbush me qindra qytetarë, aktivistë të shoqërisë civile dhe përfaqësues të ardhur posaçërisht nga diaspora, të cilët mbajtën fjalime të forta nga podiumi. Sapo u dhanë mesazhet kryesore, protesta vijoi në rrugët e Tiranës.
Të lidhura
None found
Turma përshkoi disa nga rrugët dhe nyjet më të rëndësishme të kryeqytetit, duke e bllokuar plotësisht qarkullimin. Gjatë gjithë marshimit, thirrjet kundër mazhorancës dhe institucioneve nuk pushuan për asnjë çast.
Në fund të itinerarit, qytetarët u kthyen sërish në pikën ku nisi gjithçka, përpara godinës së Kryeministrisë. Me qindra zëra të bashkuar në kor, ata përsëritën thirrjen simbol që ka shoqëruar këtë muaj qëndrese: “Rama, jep dorëheqjen!”.
Organizatorët dhe pjesëmarrësit e shpallën të përmbyllur tubimin e sotëm, por njëkohësisht dhanë një paralajmërim të prerë për qeverinë. Ata nënvizuan se nuk do të ketë asnjë hap pas dhe se marshimet do të vazhdojnë edhe në ditët e ardhshme, pa asnjë tërheqje, deri në plotësimin e kërkesës së tyre politike dhe shoqërore.
