Kryetari i Sindikatës Europiane të Kontrollorëve Ajrorë, Volker Dick gjatë një interviste me gazetaren Jonida Shehu në Radarin Informativ në ABC mori në mbrojtje kontrollorët e AlbControl-it që pezulluan punën të mërkurën duke u futur në grevë për shkak të uljes së pagave. I pyetur se cfarë mendon për kërkesat e tyre, Dick tha se “Nuk është një pyetje e lehtë për t’i dhënë përgjigje, pasi rrënjët e këtij problemi kthehen që nga viti 2014 dhe jemi munduar të kontaktojmë Sindikatën shqiptare për kontrollin e trafikut ajror.
Unë vetë kam ardhur dy herë në Shqipëri gjatë këtyre viteve dhe kjo situatë është përshkallëzuar, sikur po e shikojmë. Dhe do të thoja kur një kontrollor i trafikut ajror deklaron, që nuk është në gjendje të punojë, është standard që pranohet dhe zbatohet botërisht, por në vendin tuaj, drejtori i AlbControl-it e ka marrë si një lloj shenje si grevë të paligjshme dhe ka pushuar 5 persona nga puna” tha ai.
Shpallja e paaftësisë në grup u mor nga qeveria shqiptare si formë presioni dhe greve duke u quajtur grusht shteti nga politika. “Shumë faleminderit për këtë pyetje, kjo është rrënja e problemit. Ajo që ka ndodhur është një problematikë teknike, por qeveria e ka marrë peng, i ka marrë peng kontrollorët dhe i ka përdor për fushatën dhe i ka nxjerrë, i ka nxjerrë si “kokë turku”, për t’i sakrifikuar.
Këta 5 persona janë hequr nga puna në mënyrë të paligjshme dhe kolegët e tjerë janë shumë të stresuar në këtë krizë dhe tani po ekspozojnë veten dhe familjarët ndaj covid. Kanë dashur një diskutim me drejtuesin javën që kaloi por nuk u bë. Ministri i Transportit e ka refuzuar dhe asnjë person nuk ka folur me ata” tha Dick.
Qeveria shqiptare tha se mungesa e fluturimeve nga pandemia e vendosi AlbControl-in në vështirësi financiare, por cfarë po ndodh në Europë me vendet e tjera, a janë shkurtuar pagat? Kryetari i Sindikatës Europiane të Kontrollorëve Ajrorë shprehet se qeveria është përgjegjëse dhe duhet të paguajë pagat.
“Së pari do të thoja jo, pasi aspekti financiar për mua nuk është temë për t’u diskutuar sot dhe nuk është arsyeja përse janë hequr nga puna personat. Nuk është prekur rroga jonë. Shteti është përgjegjës për ta mbajtur të hapur dhe nuk është e vërtetë që duhet të paguhet vetëm nga personat që janë mbartës të detyrimeve. Është shteti që ka paguar pjesën që mungon, por këto gjëra duhet të negociohen nuk është vetëm njëra palë që do të përcaktojë kushtet, kjo është skllavëri”.
Por justifikimi i qeverisë shqiptare është që AlbControl nuk financohet nga shteti, vetëfinancohet, përse duhet buxheti të plotësojë këto kushte, pasi nuk ka dorë te të ardhurat e kësaj kompanie as kur është mirë? “Përgjigja është e lehtë, sepse shteti është ende pronar i hapësirës ajrore, pak rëndësi ka kush e kryen detyrën dhe shteti ka përgjegjësinë”.
I pyetur nëse do të kishte bërë të njëjtën gjë nëse do të kishte qenë në vendin e kontrollorëve shqiptarë, Dick shprehet i bindur. “Do të e thoja që PO. Kolegët e mi do të bënin të njëjtën gjë. Drejtorët e Sindikatës mbrohen nga ligji, nuk e di nëse ndodh kështu në Shqipëri, por janë gjithmonë të mbrojtur”. Por cfarë mendon ai për akuzat e qeverisë shqiptare se kontrollorët me grevën që bënë bllokuan vaksinat?
“Vaksina është një udhëtim humanitar dhe gjithmonë do të trajtohet dhe ndërmerret nëse ka 10 apo 1 ky fluturim do të kryhet dhe nuk lidhet dhe nuk ka të drejtë ministri të thotë që për shkak të kontrollorëve nuk ka ardhur. Nuk përdorim radarin, por do të doja të shikoja kush e ka anuluar dhe kush e ka mbyllur hapësirën ajrore, jo kontrollorët. I është dërguar një njoftim menaxherit të trafikut europian, që kjo hapësirë do të mbyllet, por nuk e ka dërguar kontrollorët, nuk e di kush e ka bërë”.
Por a kanë ata limite, sikur ishte greva në grup? “Kjo është saktësisht fjala që nuk do të përdorja, greva nuk është ligjore. Në Europë të gjithë kanë të drejtën të dalin në grevë, por në Shqipëri është vendosur një ligj që nuk duhet të bëhet, kjo është një situatë që do të zgjidhet më vonë. Ata kanë detyrime dhe një nga detyrimet është që kur je në punë duhet të jesh i aftë, dhe kur thua nuk jam, në fakt mbron pasagjerët. Kemi pasur mjaftueshëm aksidentet për shkak të kësaj situate, duhet kujdes i madh” përfundoi Dick. /abcnews.al
