I pranishëm në emisionin Prime në News24, gazetari Artan Hoxha tregoi se kishte biseduar gjatë ditës me Plarent Ndrecajn, avokatin e Erion Veliajt, për zhvillimet e fundit.
Sipas Hoxhës, përplasja e kryeministrit Edi Rama me kryebashkiakun e Tiranës, Erion Veliaj, e ka zanafillën në shtator, në kohën kur ky i fundit u rikthye në drejtimin e bashkisë. Gazetari tha se Ndreca i kishte treguar për komunikime që kishte pasur me persona pranë kreut të qeverisë.
Të lidhura
None found
Në vlerësimin e tij, Rama i ka vënë si avokatin, ashtu edhe Veliajn, “përpara togës së pushkatimit”. Hoxha e përshkroi trysninë e ushtruar nga kryeministri si një shtrëngim të lakut deri në atë pikë sa personi të arrijë t’i japë fund jetës.
Gazetari theksoi se, pas rikthimit në krye të Bashkisë së Tiranës, Veliaj ka ndërmarrë shkarkime. Ai shtoi se një numër i madh vendimesh nuk mund të miratohen pa nënshkrimin e kryebashkiakut.
Dërgimin e ministrit të Drejtësisë nga Rama, Hoxha e interpretoi si tregues se kryeministri i ka shteruar mënyrat e tjera të veprimit.
Duke folur për dhunën, gazetari u shpreh se situata ka mbërritur në një pikë ku dhuna policore ndaj studentëve duket e papërfillshme. Sipas tij, nëse një trajtim i tillë i ndodh kryetarit të Bashkisë së Tiranës, mund të përfytyrohet se çfarë dhune dhe rrahjesh përjetojnë të burgosurit në burgjet e vendit.
