Himara ka çelur zyrtarisht këtë të shtunë sezonin turistik me një seri aktivitetesh festive, të cilat do të kulmojnë në mbrëmje me një koncert të madh, ku do të performojnë Ronela Hajati dhe Elita 5.
Festimet do të vijojnë edhe të nesërmen me një tjetër koncert, ku në skenë do të ngjitet këngëtari grek Konstantinos Argiros.
Të lidhura
None found
Kryetari i Bashkisë së Himarës, Vangjel Tavo, prezantoi programin e aktiviteteve, duke u shprehur i kënaqur me pjesëmarrjen e lartë të qytetarëve dhe turistëve.
Ai theksoi se këto evente synojnë ta promovojnë Himarën jo vetëm si një destinacion tërheqës turistik, por edhe si një zonë me vlera të pasura.
“Dje ka qenë dita e parë, plot aktivitete edhe pse koha nuk ishte në favor. Sot filluam me një sërë aktivitetesh, një paradë veshjesh të fëmijëve të vegjël, në darkë do të kemi performancën e Ronela Hajati dhe Elita 5. Nesër do të jetë kulmi. Ne synojmë të promovojmë kulturën, kulinarinë dhe historinë”, tha Tavo.
Ndërkohë, në mbrëmjen e djeshme, në zonën e Potamit në Himarë u zhvillua një koncert me këngë dhe valle popullore, duke shënuar hapjen zyrtare të aktiviteteve për sezonin turistik.
