Policia ka arrestuar Ronaldo Mehmetin dhe Romeo Memetalin, të dy 26 vjeç, të dyshuar për vjedhje në biznese dhe automjete në Pogradec e Korçë. Sipas njoftimit, hetimet kanë zbardhur gjashtë raste vjedhjesh.
Operacioni policor “Qarku” u zhvillua nga Komisariati i Policisë Pogradec, në bashkëpunim me Komisariatin e Policisë Korçë, si pjesë e punës për identifikimin e autorëve dhe zbardhjen e vjedhjeve.
Të lidhura
None found
Me vendbanim në fshatin Drenovë dhe në Korçë, dy të arrestuarit u kapën gjatë operacionit. Në banesat e tyre policia gjeti dhe sekuestroi sendet e dyshuara të vjedhura, një shumë parash dhe automjetin që, sipas hetimeve, përdornin për të lëvizur.
Policia ka identifikuar edhe një bashkëpunëtor të dyshuar, E. Ll., banues në Kamëz, i cili është shpallur në kërkim. Vijojnë veprimet për lokalizimin dhe kapjen e tij.
Hetimet tregojnë se të dyshuarit mund të kenë kryer vjedhje në pesë biznese dhe të disa sendeve nga një automjet në Pogradec dhe Korçë. Në bashkëpunim me Prokurorinë po punohet për dokumentimin ligjor të rasteve të tjera të mundshme.
Materialet procedurale i janë dërguar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprën penale “Vjedhja”, e kryer në bashkëpunim më shumë se një herë.
