Një zjarr i madh pyjor në Los Gallardos, në provincën juglindore të Almerías, u ka marrë jetën të paktën 12 personave dhe ka lënë të plagosur edhe gjashtë të tjerë, sipas autoriteteve rajonale të Andaluzisë.
Të lidhura
None found
Si pasojë e përhapjes së flakëve, rreth 1 000 banorë janë larguar nga banesat e tyre, ndërsa disa akse rrugore janë mbyllur.
Autoritetet bëjnë të ditur se disa prej viktimave janë gjetur brenda automjeteve të kapluara nga zjarri. Dëshmitarët kanë ngritur dyshime se shkaku mund të ketë qenë rrëzimi i një linje elektrike, por deri tani nuk ka ende një konfirmim zyrtar.
Afërsisht 150 zjarrfikës, me mbështetjen e Njësisë Ushtarake të Emergjencave (UME), po ndërhyjnë për të izoluar dhe kontrolluar flakët pranë fshatit Bédar. Nga të plagosurit, një person është dërguar në spital pas thithjes së tymit, një tjetër ka marrë djegie, ndërsa katër të tjerë janë trajtuar në vend për lëndime të lehta dhe vështirësi në frymëmarrje.
Presidenti i qeverisë rajonale të Andaluzisë, Juanma Moreno, e përshkroi ngjarjen si “një tragjedi” dhe u shprehu ngushëllime familjeve të viktimave. Më herët, kryeministri spanjoll Pedro Sánchez kishte deklaruar se vendi do të vinte në lëvizje kapacitetet më të mëdha për t’u përballur me zjarret gjatë sezonit të verës.
Rasti në Almería është pjesë e një vale zjarresh që po përfshin Evropën Jugore, të nxitura nga temperaturat e larta, të cilat në disa zona shkojnë deri në 40–42 gradë Celsius. Qindra zjarrfikës janë të angazhuar edhe në Portugali dhe Francë, ndërsa mijëra banorë janë evakuuar nga zonat e kërcënuara.
Të dhënat e Sistemit Evropian të Informacionit për Zjarret në Pyje (EFFIS) tregojnë se vitin e kaluar në Spanjë u dogjën rreth 393 000 hektarë tokë, një shifër më shumë se gjashtë herë mbi mesataren e viteve 2006–2024. Në të njëjtën kohë, shërbimi klimatik Copernicus nënvizon se Evropa po ngrohet më shpejt se çdo kontinent tjetër në botë, çka po i bën valët e të nxehtit dhe zjarret pyjore gjithnjë e më të shpeshta dhe më të forta.
Ekspertët paralajmërojnë se ndryshimet klimatike pritet të vazhdojnë ta shtojnë rrezikun e zjarreve të mëdha në rajonin e Mesdheut dhe në zona të tjera të Evropës edhe në vitet që vijnë.
