Gjatë një tubimi elektoral në Daytona Beach të Floridës, presidenti amerikan Donald Trump u detyrua të ndalonte për disa çaste fjalimin, pasi e kishte të vështirë të mbante syrin hapur. Ai përdori një pecetë të lagur me ujë për ta pastruar.
Ngjarja u regjistrua rreth një orë pasi kishte nisur aktiviteti, i organizuar në kuadër të fushatës për zgjedhjet e mesmandatit që mbahen të martën në SHBA.
Të lidhura
None found
“E keni problem? Kam diçka në sy, shikoni”, iu drejtua Trump pjesëmarrësve, përpara se të fshinte syrin me pecetë.
Pas kësaj, ai tha: “Ah, shumë më mirë tani”, ndërsa pjesën e mbetur të ujit e hodhi në drejtim të publikut. Presidenti foli edhe për pikat e syve, duke u shprehur se do të kishte dashur t’i kishte me vete.
Trump e përdori këtë episod për t’iu kundërpërgjigjur kritikëve që kanë vënë në dyshim gjendjen e tij shëndetësore, veçanërisht pas anulimit fillestar të dy tubimeve të planifikuara në Kansas dhe Iowa.
“Nëse do t’i përdorja, ata do të thoshin se jam shumë i sëmurë dhe se diçka nuk shkon me mua”, deklaroi ai.
Dy aktivitetet elektorale ishin anuluar fillimisht, duke shkaktuar spekulime për arsyet e vendimit, por të premten të dyja u rikthyen në kalendar.
Një ditë më herët, presidenti u përplas edhe me një gazetar të Reuters. Ky i fundit e pyeti nëse Trump kishte hequr dorë nga udhëtimi në Kansas për shkak të lodhjes nga udhëtimet. Përgjigjja e presidentit ishte e ashpër: ai e ofendoi gazetarin dhe komentoi edhe paraqitjen e tij fizike.
Tubimi në Florida u ndërpre gjithashtu nga disa protestues, të paktën tre prej të cilëve u nxorën nga aktiviteti. Trump pretendoi, pa paraqitur prova, se ata paguheshin nga miliarderi dhe donatori demokrat George Soros.
Gjatë fjalimit, Trump sulmoi demokratët dhe përsëriti premtimin se çdo qytetar i rritur amerikan do të merrte nga 5 mijë dollarë nëse republikanët sigurojnë kontrollin e të dyja dhomave të Kongresit.
Presidenti foli edhe për konfliktin me Iranin, duke pretenduar se Shtetet e Bashkuara kanë neutralizuar kapacitetet bërthamore të Teheranit. Ai përmendi gjithashtu arrestimin e presidentit venezuelian Nicolás Maduro.
