Një lëkundje sizmike me magnitudë 7.4 ballë goditi sot Kolumbinë, duke shkaktuar dëmtime në ndërtesa dhe plagosjen e disa personave.
Forca e tërmetit përhapi frikë te banorët, të cilët u larguan me nxitim nga godinat dhe dolën në rrugë, nga frika e shembjeve të mundshme dhe goditjeve të tjera sizmike.
Të lidhura
None found
Të dhënat e Qendrës Sizmologjike Evropiane-Mesdhetare (EMSC) tregojnë se tërmeti u regjistrua në një thellësi prej rreth 115 kilometrash. Sipas Agjencisë Gjeologjike të Kolumbisë, epiqendra ishte në provincën Chocó, përgjatë bregdetit të Paqësorit.
Lëkundjet u ndjenë fuqishëm në Bogotá dhe Cali, ndërsa raportime për to pati edhe nga vendet fqinje, mes tyre Venezuela, Ekuadori dhe Panamaja. Shërbimi Gjeologjik i Shteteve të Bashkuara (USGS) njoftoi se nuk kishte paralajmërim për cunami.
Në zonat e prekura, paniku u shoqërua me largimin e banorëve nga ndërtesat, ndërsa në rrugë ranë fragmente betoni dhe xhama. Pamjet e para të publikuara nga vendngjarja tregojnë qytetarë të tronditur, që përpiqen të distancohen nga hapësirat e rrezikshme.
Menjëherë pas lëkundjeve, banorët dhe ekipet e emergjencës shkuan pranë godinave të dëmtuara për të verifikuar nëse kishte persona të bllokuar ose të lënduar.
Dëmtime të mëdha u raportuan gjithashtu në Katedralen Metropolitane, ku pas tërmetit duket se është shembur një pjesë e kupolës.
Guvernatorja e provincës Chocó, Nubia Carolina Córdoba-Kouri, deklaroi se autoritetet janë të shqetësuara për mundësinë e lëkundjeve pasuese dhe se ka nisur procesi i vlerësimit të dëmeve.
“Sapo kemi përjetuar një tërmet të fortë në provincën e Chocó-s. Jemi të shqetësuar për lëkundjet pasuese. Edhe pse epiqendra ishte pranë San José del Palmar, ka të lënduar dhe dëme të konsiderueshme në ndërtesa në Quibdó”, u shpreh ajo.
