Sulmi i Hamasit më 7 tetor 2023 ka lënë gjurmë të forta në mënyrën se si brezi i ri në Izrael po përcakton bindjet e tij politike.
Të lidhura
None found
Rreth 550 mijë të rinj do të votojnë për herë të parë këtë muaj. Një sondazh i televizionit izraelit Channel 12 tregon se 74 për qind e tyre e cilësojnë veten si votues të djathtë ose të qendrës së djathtë, ndërsa siguria renditet mbi ekonominë dhe paqen.
Për Amihain, 18 vjeç, zgjedhjet e 27 tetorit nuk kanë në qendër perspektivat financiare, por vazhdimin e jetës në vendin e tij. Për AFP-në, ai thotë: “Nuk votoj për atë që do të më ndihmojë të blej një apartament pas dhjetë vjetësh, por për atë që garanton se do të jem ende gjallë këtu”.
Amihai, i cili merr pjesë në një tubim në mbështetje të vendbanimeve hebraike në Gazë, deklaron se mbështet partinë ultranacionaliste të ministrit të Sigurisë Kombëtare, Itamar Ben Gvir.
Ai i përket një brezi të formuar gjatë viteve të qeverisjes së Benjamin Netanyahut. Analistja Dahlia Scheindlin vlerëson se orientimi i të rinjve hebrenj izraelitë drejt së djathtës ka nisur të konsolidohet prej rreth dy dekadash.
Ndryshe nga brezat më të vjetër, të cilët ende kujtojnë shpresat për një marrëveshje paqeje me palestinezët, shumë të rinj e shohin këtë mundësi gjithnjë e më të largët.
Megjithatë, jo të gjithë të rinjtë ndjekin të njëjtin drejtim politik. Gili, 18 vjeçe, mbështet demokratët e qendrës së majtë dhe beson se frika e shkaktuar nga sulmi i Hamasit e ka bërë shoqërinë më radikale dhe më skeptike ndaj paqes.
Edhe Yuvali, bashkëmoshatar i saj, shprehet në favor të një marrëveshjeje politike me palestinezët. “Menaxhimi i konfliktit nuk është zgjidhje”, thotë ai, duke shpresuar për një të ardhme ku të rinjtë të kenë mundësi të ndërtojnë jetën e tyre.
