Shembja e minierës së arit Al-Zara, në një zonë të thellë në veri të qytetit al-Nuhud, në shtetin Perëndimor Kordofan të Sudanit, ka shkaktuar të paktën 60 viktima.
Të lidhura
None found
Dy persona që i mbijetuan incidentit i thanë agjencisë AFP se ende mund të ketë punëtorë të tjerë të bllokuar nën rrënoja. Përpjekjet për kërkimin dhe shpëtimin e tyre kanë vazhduar gjatë gjithë natës.
“Nuk kemi informacion se sa njerëz mund të jenë ende brenda”, deklaroi Khair al-Sayed Jabara, i cili, së bashku me punëtorë të tjerë, u përfshi në operacionet për nxjerrjen e të mbijetuarve pas shembjes.
Al-Amin Suleiman, një tjetër punëtor i minierës, tha se ekipet kanë nxjerrë deri tani 60 trupa nga rrënojat, ndërsa disa persona vazhdojnë të mbeten të bllokuar që prej ditës së mëparshme.
“Deri tani janë nxjerrë 60 trupa, por në atë vend ka ende njerëz të bllokuar që nga dje. Nuk besoj se kanë mbijetuar”, u shpreh Suleiman.
Sipas tij, puset e minierave ishin hapur shumë pranë njëri-tjetrit. Për këtë arsye, shembja e njërit prej puseve solli rënien e strukturave përreth.
Ngjarje të tilla janë të shpeshta në minierat e vogla dhe të paligjshme të arit në Sudan, ku kushtet e punës janë të rrezikshme dhe masat e sigurisë mungojnë.
Ari është kthyer në një burim të rëndësishëm financimi gjatë luftës që nisi në prill 2023 mes ushtrisë sudaneze dhe Forcave paraushtarake të Mbështetjes së Shpejtë (RSF). Të dyja palët mbështeten kryesisht te industria minerare, përveç ndihmës që marrin nga vende të huaja.
Lufta ka dëmtuar rëndë ekonominë sudaneze dhe ka thelluar krizën humanitare. Të dhënat e fundit të OKB-së tregojnë se rreth 20 milionë persona përballen me pasiguri akute ushqimore.
Humbja e vendeve të punës dhe rëndimi i situatës ekonomike kanë bërë që shumë qytetarë t’i drejtohen kërkimit të arit, duke shtuar numrin e punëtorëve në miniera të vogla dhe shpesh jashtë standardeve të sigurisë.
