Gjykata Supreme e Shteteve të Bashkuara ka vendosur që shtetet kanë të drejtë të ndalojnë gratë transgjinore të marrin pjesë në ekipet sportive të vajzave dhe grave në shkollat publike dhe kolegjet, duke lënë në fuqi ligjet e miratuara në Idaho dhe West Virginia.
Sipas vendimit, këto kufizime të vendosura nga shtetet nuk bien në kundërshtim me Titullin IX, ligjin federal që ndalon diskriminimin mbi bazën e seksit në institucionet arsimore. Sa i takon Amendamentit të 14-të të Kushtetutës së SHBA-së, gjashtë gjyqtarët konservatorë arritën në përfundimin se ndalimet nuk cenojnë të drejtën për mbrojtje të barabartë, ndërsa tre gjyqtarët liberalë dolën kundër këtij qëndrimi.
Të lidhura
None found
Në argumentimin e shumicës, gjyqtari Brett Kavanaugh theksoi se as Kushtetuta dhe as Titulli IX nuk imponojnë ndryshime në rregullat që rregullojnë sportet e grave dhe vajzave në Shtetet e Bashkuara. Në mendimin kundërshtues, gjyqtarja Sonia Sotomayor u shpreh se shumica kishte përdorur një lexim tepër të ngushtë të parimit të mbrojtjes së barabartë.
Vendimi erdhi pas padive të paraqitura nga studentë transgjinorë kundër ligjeve të Idaho-s dhe West Virginia-s, të cilat kërkojnë që sportistët të garojnë në bazë të seksit të regjistruar në lindje. Në njërën prej çështjeve argumentohej se ndalimi shkelte Kushtetutën e SHBA-së, ndërsa në tjetrën pretendohej se ai binte ndesh me ligjin federal për të drejtat civile.
Një prej padive ishte ngritur nga Lindsay Hecox, një atlete transgjinore e garave të vrapimit në distanca të gjata, e cila sfidoi ligjin e Idaho-s menjëherë pasi ai hyri në fuqi. Më parë, gjykatat më të ulëta kishin bllokuar zbatimin e këtij ligji dhe një panel i gjykatës së apelit kishte vlerësuar se shteti nuk kishte sjellë prova të mjaftueshme që ndalimi mbronte barazinë dhe mundësitë për atletet femra.
Barbara Ehardt, ligjvënësja e Idaho-s që propozoi ligjin në vitin 2020, kishte deklaruar se nisma kishte për qëllim të siguronte drejtësi për vajzat dhe gratë në sport. Që nga ajo periudhë, më shumë se dy duzina shtete amerikane kanë miratuar ligje të ngjashme.
Ky vendim është mirëpritur nga zyrtarë republikanë. Prokurori i Përgjithshëm i West Virginia-s, JB McCuskey, e përshkroi atë si një fitore për drejtësinë dhe sigurinë e atleteve femra. Edhe presidenti Donald Trump reagoi pozitivisht, duke e cilësuar si një “fitore të madhe” dhe duke kujtuar se pjesëmarrja e sportisteve transgjinore kishte qenë pjesë e platformës së tij politike.
