Një ngjarje e rëndë me armë zjarri tronditi shkollën fillore “Silver Rail” në Bend të Oregonit, SHBA, ku mbetën të vrarë tre fëmijë 5, 8 dhe 11 vjeç, si dhe një mësues.
Sulmuesi, një 16-vjeçar, u qëllua për vdekje nga një qytetar që e ndoqi brenda godinës para se në vendngjarje të mbërrinte policia.
Të lidhura
None found
Mes viktimave të sulmit nuk ishin vetëm të vrarët. Një fëmijë 7-vjeçar dhe një mësues 54-vjeçar u plagosën rëndë dhe u transportuan në spital në gjendje kritike.
Të shtënat ndodhën të enjten, më 15 tetor, rreth orës 13:00 sipas kohës lokale. Sipas të dhënave të policisë, adoleshenti nga Bend përdori një armë zjarri me tytë të gjatë për të hapur me forcë dyert e mbyllura të shkollës, më pas duke qëlluar brenda saj.
Telefonata e parë në shërbimet e emergjencës raportoi të shtëna ndaj një automjeti pranë shkollës. Pas pak kohe, autoritetet morën njoftime të tjera për praninë e një personi të armatosur brenda kompleksit shkollor.
Një qytetar, i cili e pa të riun teksa hynte në godinë, e ndoqi dhe e vrau para se të arrinin efektivët. Autoritetet e kanë cilësuar atë si pjesëtar të komunitetit lokal, por ende nuk kanë sqaruar nëse ishte prind i ndonjë nxënësi. Emri i tij nuk është bërë publik.
Guvernatorja e Oregonit, Tina Kotek, e konsideroi ndërhyrjen e qytetarit të rëndësishme për ndalimin e një bilanci edhe më tragjik.
“Ndërhyri për të parandaluar humbjen e më shumë jetëve”, deklaroi Kotek, ndërsa shprehu dhimbjen e saj për viktimat dhe familjet e tyre.
Policia ende nuk ka zbuluar identitetin e 16-vjeçarit dhe nuk ka konfirmuar nëse ai kishte lidhje me shkollën. Shkaqet e sulmit mbeten të panjohura, ndërsa hetuesit po përpiqen të përcaktojnë rrethanat dhe mënyrën se si i mituri hyri në ndërtesë.
FBI-ja është angazhuar gjithashtu në hetim, duke ofruar agjentë dhe burime në mbështetje të autoriteteve lokale.
Pas incidentit, shkolla u mbyll dhe nxënësit së bashku me punonjësit u nxorën nga godina. Familjet u udhëzuan të shkonin në një pikë të posaçme grumbullimi pranë shkollës, ku u ribashkuan me fëmijët e tyre.
Distrikti shkollor Bend-La Pine bëri të ditur se të gjitha shkollat do të jenë të mbyllura të premten, më 16 tetor. Për shkak të ngjarjes, u anuluan edhe aktivitetet shkollore dhe eventet sportive.
Tragjedia ka shkaktuar tronditje të madhe në komunitetin lokal dhe ka rikthyer diskutimet mbi dhunën me armë në shkollat amerikane. Autoritetet kanë njoftuar se hetimet do të vijojnë, ndërsa nxënësve, familjeve dhe stafit do t’u ofrohet mbështetje psikologjike.
