Pas më shumë se 250 ditësh në det, SHBA planifikon zëvendësimin e USS Abraham Lincoln mes shqetësimeve për ekuipazhin

Pas një misioni që ka zgjatur mbi 250 ditë në det, aeroplanmbajtësja amerikane USS Abraham Lincoln pritet të largohet nga Lindja e Mesme dhe të zëvendësohet. Familjet e marinsave kanë shprehur shqetësim për rraskapitjen e thellë dhe gjendjen psikologjike të ekuipazhit.

Një prej marinsave në bordin e anijes i shkroi një familjari në WhatsApp: “Jam i rraskapitur. I vdekur fare”, pasi kishte kaluar më shumë se 250 ditë në det.

Duke folur për BBC-në pa zbuluar identitetin, familjari tregoi se marinsi kishte humbur rreth 29 kilogramë që prej nisjes së misionit. Ai tha se ngarkesa e rëndë psikologjike kishte prekurur edhe pjesëtarë të tjerë të ekuipazhit.

Sipas pretendimeve të tij, disa marinsa janë përpjekur të hidhen nga anija. Ai ngriti gjithashtu shqetësime lidhur me kushtet në të cilat jeton personeli në bord.

Dëshmia tregon se ndalesat në porte kanë qenë të pakta, duke e bërë më të vështirë sigurimin e ushqimeve të freskëta. Marinsat, edhe kur aeroplanmbajtësja ankorohet në port, nuk marrin gjithmonë leje për të dalë nga anija.

Edhe të afërm të tjerë të pjesëtarëve të ekuipazhit kanë paralajmëruar për probleme me shëndetin mendor të personelit. USS Abraham Lincoln u nis nga Kalifornia në nëntor dhe fillimisht u drejtua për në Detin e Kinës Jugore, përpara dislokimit në Lindjen e Mesme.

Raportimet për gjendjen në aeroplanmbajtëse janë kundërshtuar nga sekretari amerikan i Mbrojtjes, Pete Hegseth, i cili i përshkroi ato si “të paraqitura krejtësisht në mënyrë të shtrembëruar”.

Wall Street Journal raporton, megjithatë, se Marina amerikane ka marrë vendimin të dërgojë në Lindjen e Mesme aeroplanmbajtësen USS George Washington. Anija, e dislokuar aktualisht në Paqësor, e ka bazën në një port pranë Tokios.

USS George Washington pritet të marrë vendin e USS Abraham Lincoln, e cila ka vepruar prej muajsh në ujërat afër Iranit dhe është përfshirë në operacionin “Epic Fury” kundër Republikës Islamike.

Ky ndryshim bëhet pas dislokimit të tejzgjatur të ekuipazhit, në një kohë kur rajoni po përballet me tensione të larta ushtarake.