Një raport i AFL-CIO zbulon se kompensimi i përfituar nga Elon Musk në Tesla gjatë vitit 2025 ishte rreth 2.5 milionë herë më i lartë se paga e punonjësit mesatar të kompanisë.
Të lidhura
None found
Me një vlerë prej 158.3 miliardë dollarësh, paketa e Musk-ut ndikoi ndjeshëm në thellimin e diferencës së pagave ndërmjet drejtuesve të korporatave dhe punëtorëve amerikanë. AFL-CIO, federata më e madhe sindikale në Shtetet e Bashkuara, konstatoi se hendeku mes drejtuesve të kompanive më të mëdha dhe punonjësve të tyre u zgjerua më tej gjatë vitit 2025.
Nëse Musk-u nuk merret në përllogaritje, CEO-t e kompanive të S&P 500 morën mesatarisht 312 herë më shumë se punonjësi mesatar. Një vit më parë, në 2024, ky raport qëndronte në 285 me 1.
Përfshirja e kompensimit të Musk-ut nga Tesla e çon raportin mesatar në 5,387 me 1. Të dhënat e raportit tregojnë se, pa llogaritur Musk-un, kompensimi mesatar vjetor i një CEO-je të S&P 500 arriti në 22.8 milionë dollarë në 2025, nga 18.9 milionë dollarë që ishte një vit më herët.
Sipas “The Guardian”, kur në përllogaritje shtohet paketa e jashtëzakonshme e Musk-ut, mesatarja ngjitet në 340.1 milionë dollarë.
AFL-CIO vëren se gjatë vitit 2025 Musk siguronte çdo pak sekonda një shumë të barabartë me pagën mesatare të një punonjësi të Tesla-s. Raporti nënvizon gjithashtu se shumica e CEO-ve të S&P 500 fituan në vetëm një ditë më tepër nga sa merr punëtori mesatar amerikan për një vit të plotë.
Këto të dhëna paraqiten në raport si dëshmi e thellimit të pabarazisë në të ardhura brenda ekonomisë amerikane. Sipas shifrave të cituara, pesha e punëtorëve në të ardhurat kombëtare të SHBA-së ka zbritur në pikën më të ulët që prej periudhës pas Luftës së Dytë Botërore.
Në analizën e AFL-CIO janë përfshirë edhe të ardhurat e presidentit amerikan Donald Trump për vitin 2025.
Të dhënat e paraqitura tregojnë se Trump përfitoi rreth 2.2 miliardë dollarë, kryesisht falë zotërimeve të tij në kriptovaluta. Krahasuar me vitin 2024, kjo shumë përbën një rritje prej afro 254%.
Një punëtori mesatar amerikan do t’i duheshin rreth 43,154 vjet për të siguruar një shumë të barabartë.
Sekretari-arkëtar i AFL-CIO, Fred Redmond, kritikoi përqendrimin e pasurisë në këto përmasa. Ai argumentoi se politikat ekonomike të administratës Trump dhe të drejtuesve të korporatave u kanë shërbyer të pasurve, duke dëmtuar punëtorët.
