Presidenti i Shteteve të Bashkuara, Donald Trump, ka deklaruar se Britania i shpëtoi një kërcënimi bërthamor falë operacionit të përbashkët ushtarak amerikan dhe izraelit kundër Iranit. Gjatë një interviste për rrjetin britanik GB News, ai sulmoi sërish qeverinë e Mbretërisë së Bashkuar dhe kryebashkiakun e Londrës, Sadiq Khan, duke vënë në shënjestër qëndrimin e tyre përkonfliktin dhe çështjet e emigracionit.
Të lidhura
None found
Trump e mbrojti me forcë nisjen e fushatës ushtarake më 28 shkurt, të kryer në koordinim me Izraelin, duke e cilësuar atë si një veprim që parandaloi një rrezik edhe më të madh për kontinentin evropian. Sipas tij, posedimi i armëve bërthamore nga Teherani do të rriste ndjeshëm mundësinë e përdorimit të tyre kundër caqeve në Evropë.
“Unë po mbroj edhe vendin tuaj nga i njëjti rrezik. Nëse Irani do të kishte një bombë atomike, gjasat janë më të mëdha që ta përdorte në Evropë”, u shpreh presidenti amerikan. Ai argumentoi se raketat iraniane kanë rreze veprimi për të goditur Evropën, por jo territorin amerikan, megjithëse regjimi në Teheran ka mohuar vazhdimisht gjatë dekadave se synon të ndërtojë një arsenal bërthamor.
Duke iu referuar refuzimit të Londrës për t’u angazhuar ushtarakisht në konflikt, një pozicion i mbajtur gjatë qeverisjes së ish-kryeministrit laburist Keir Starmer, Trump la të kuptohej se kjo mund të ketë pasoja për mbështetjen e Uashingtonit në mosmarrëveshjen për Ishujt Falkland, të njohur si Malvinas në Argjentinë. “Mos harroni, një pjesë e mirë e naftës që përdorni kalon nga Ngushtica e Hormuzit, dhe ju nuk ishit aty për të më ndihmuar”, tha ai.
Kreu i Shtëpisë së Bardhë nuk e kurseu as Sadiq Khan, të cilin e përshkroi si “një njeri të tmerrshëm” dhe “shumë të keq”. Ai përsëriti pretendimet se disa zona të Londrës janë jashtë kontrollit për shkak të kriminalitetit dhe valëve të emigracionit. “Londra është bërë një vend krejt tjetër. Ka lagje në Paris dhe në Londër ku as policia nuk guxon të shkojë, nga frika se mund të humbasë jetën”, pohoi Trump.
Në të njëjtën intervistë, presidenti amerikan iu kthye edhe paralajmërimeve për politikat britanike të emigracionit dhe energjisë, duke folur për një rrezik real “katastrofe”. “Nëse vazhdoni të lejoni njerëz nga e gjithë bota të hyjnë në vendin tuaj, së shpejti nuk do të keni më vend”, paralajmëroi ai.
Reagimi nga ana e Sadiq Khan erdhi disa orë më vonë përmes një burimi pranë tij, i cili akuzoi Trumpin se është “i fiksuar” pas kryebashkiakut të kryeqytetit britanik. Sipas këtij burimi, shifrat e krimit kanë shënuar rënie në të gjithë Londrën, ndërsa krimi i dhunshëm mbetet shumë më i ulët se në çdo metropol të madh amerikan. Ai theksoi se Londra vijon të jetë një qytet global, i larmishëm dhe i begatë, “qyteti më i mirë në botë”.
“Trump thjesht nuk mund ta pranojë suksesin tonë”, ishte mesazhi përmbyllës nga ekipi i kryebashkiakut.
