Tensionet në Lindjen e Mesme janë përshkallëzuar sërish, pasi ushtria iraniane dhe Garda Revolucionare deklaruan se kanë ndërmarrë sulme me raketa balistike dhe dronë ndaj instalimeve ushtarake amerikane në Bahrein, Irak dhe Jordani.
Të lidhura
None found
Ky reagim erdhi pasi Shtetet e Bashkuara kishin nisur më herët një tjetër valë sulmesh kundër Iranit. Ndërkohë, sistemet e mbrojtjes ajrore u vunë në funksion në Bahrein dhe Kuvajt.
Agjencia shtetërore iraniane e lajmeve Tasnim raportoi se forcat iraniane kishin goditur Bazën Ajrore Amerikane Sheikh Issa në Bahrein.
Sipas agjencisë, “Ushtria e Republikës Islamike të Iranit shënjestroi, për disa orë, instalimet e radarëve dhe pikat e grumbullimit të forcave tokësore amerikane në Bazën Ajrore Sheikh Issa në Bahrein”.
Pas sulmit, në Bahrein u aktivizuan sirenat e alarmit. Autoritetet u kërkuan banorëve të ruanin qetësinë dhe të strehoheshin në vende të sigurta.
Garda Revolucionare bëri të ditur gjithashtu se, në orët e para të mëngjesit, kishte zhvilluar një operacion të koordinuar kundër bazave amerikane në Arbil, të Irakut.
Objektivat e deklaruara në këtë sulm ishin “qendra mirëmbajtjeje”, “depo pajisjesh teknike” dhe një “balon vëzhgimi”, sipas Gardës Revolucionare.
Po kjo forcë njoftoi edhe një “sulm intensiv me raketa balistike” ndaj një baze amerikane në Jordani.
Tasnim raportoi se bëhej fjalë për një bazë të Korpusit të Marinës, të njohur si Kampi Titin, e vendosur në Gjirin e Akabës, pranë kufirit të Jordanisë me Izraelin dhe Arabinë Saudite.
Ushtria jordaneze deklaroi se kishte interceptuar dhe shkatërruar dhjetë raketa balistike, ndërsa tre të tjera kishin rënë në zona të pabanuara. Sipas njoftimit, nuk pati persona të lënduar.
Edhe forcat e armatosura të Kuvajtit njoftuan se sistemet e mbrojtjes ajrore po përballeshin me “kërcënime nga raketat dhe dronët armik”.
