Të martën në mëngjes, në lagjen Sant Gervasí-La Bonanova të Barcelonës u krijua një gropë e madhe me diametër rreth nëntë metra, çka i shtyu autoritetet të evakuonin banorët e pesë pallateve për arsye sigurie.
Fundosja e tokës, sipas autoriteteve, ndodhi në oborrin e një kompleksi banimi pranë zonës ku po kryhen punimet për zgjerimin e linjës L9 të metrosë. Në vendngjarje shkuan menjëherë gjashtë mjete zjarrfikëse, ndërsa ekipet teknike nisën ta mbushnin gropën me beton për të stabilizuar truallin dhe për të shmangur rrezikun për godinat përreth.
Të lidhura
None found
Shefi i Departamentit të Zjarrfikësve të Barcelonës bëri të ditur se largimi i banorëve u realizua si masë parandaluese dhe se zona po mbahet nën vëzhgim të vazhdueshëm për të zbuluar çdo lëvizje të re të tokës.
Banorët e nxjerrë nga banesat u strehuan përkohësisht në një qendër lokale, ndërsa autoritetet ngritën edhe një pikë informacioni për t’i mbajtur të informuar mbi ecurinë e situatës.
Nga hetimet paraprake rezulton se shembja e terrenit mund të ketë lidhje me punimet që po zhvillohen në zonë, megjithatë ende nuk ka një konfirmim përfundimtar nga autoritetet. Po ashtu, nuk është bërë ende e ditur se kur banorët do të lejohen të kthehen në shtëpitë e tyre.
Sipas teknikëve, ky incident nuk është i njëjtë me shembjen e madhe të ndodhur në lagjen Carmel në vitin 2005. Ata theksuan se tuneli i metrosë në këtë zonë është tashmë i ndërtuar dhe se linja vazhdon të funksionojë normalisht, ndërsa të dhënat e instrumenteve kanë shënuar rritje të lëvizjeve vertikale të tokës, gjë që shton dyshimet se shembja lidhet me punimet për zgjerimin e linjës L9.
Banorët thanë se prej ditësh kishin vënë re çarje në apartamentet e tyre. Një grua rrëfeu se katër ditë më parë ishte shfaqur një çarje e gjatë nga tavani deri në dysheme dhe se dera e banesës së saj nuk mbyllej më si më parë.
E njëjta banore përshkroi edhe çastin e shembjes, duke treguar se rreth orës 09:00 dëgjoi dy zhurma të forta të shoqëruara me dridhje, ndërsa afërsisht një orë më pas zjarrfikësit u kërkuan banorëve të largoheshin nga ndërtesa.
Një punonjëse e një picerie pranë vendit të ngjarjes tha gjithashtu se, kur hapi lokalin në mëngjes, vuri re se pjesa e pasme e tij ishte shembur dhe se banjoja ishte përpirë nga gropa.
