Rreth 1.4 milionë skedarë të marrë nga qeveria e qytetit të Berlinit janë nxjerrë në rrjetin e errët nga një grup hakerësh, pasi përfundoi afati për pagesën e një shpërblimi prej rreth 2 milionë eurosh.
Të lidhura
None found
Sipas transmetuesit publik rajonal RBB, informacionet janë vënë në dispozicion për shkarkim në disa grupe. Në mesin e materialeve të publikuara gjenden edhe të dhëna personale, ku përfshihen certifikata pune, oferta dhe vlerësime të punonjësve.
Në njoftimin e tij, grupi i hakerëve shkroi: “Argëtohuni, gjuetarë të të dhënave”.
Institucionet e Berlinit u goditën nga sulmi kibernetik më 14 gusht, çka bëri që shërbimet komunale, sidomos ato të lidhura me strehimin dhe mjedisin, të shkëputeshin përkohësisht nga rrjeti. Për disa ditë, banorët nuk arritën të finalizonin aplikime apo pagesa për përfitimet e strehimit.
Në fund të gushtit, kryebashkiaku i Berlinit, Kai Wegner, pranoi se qyteti ishte përballur me një përpjekje shantazhi pas sulmit kibernetik dhe theksoi se autoritetet “nuk do t’i nënshtroheshin” kërkesave të hakerëve.
Me këtë sulm është lidhur grupi Rhysida, i cili sipas mediave gjermane ka marrë përgjegjësinë edhe për sulmin ndaj Bibliotekës Britanike në Londër në vitin 2023. Në atë rast, hakerët kërkuan 20 bitcoin dhe, pasi pagesa u refuzua, publikuan rreth 500 mijë skedarë me të dhëna personale të vizitorëve, abonentëve dhe stafit.
Dalja në publik e të dhënave të Berlinit ndodh vetëm pak javë përpara zgjedhjeve komunale të 20 shtatorit. Autoritetet kanë njoftuar se sulmi kibernetik nuk ka prekur procesin zgjedhor.
