Policia franceze njoftoi arrestimin e pesë personave në kuadër të një operacioni kundër një rrjeti që transportonte lëndë narkotike me dronë drejt burgut Villefranche-sur-Saône.
Të lidhura
None found
Tre nga pesë të dyshuarit u kapën në flagrancë. Mes personave të arrestuar ndodhet edhe një i mitur, i cili është dërguar në një qendër edukative të mbyllur, ku do të qëndrojë deri në gjykimin e tij në shtator.
Katër të dyshuarit e rritur pritet të gjykohen në tetor, ndërsa tre prej tyre janë mbajtur në paraburgim.
Autoritetet e përshkruan organizatën si “shumë të strukturuar”. Aktiviteti zhvillohej nga “dy zona nisjeje”, të cilat ndodheshin në afërsi të madhe me burgun.
Për të shmangur zbulimin e pozicionit të dronëve dhe të qelisë ku do të dërgohej droga, fluturimet realizoheshin natën dhe pajisjet përdoreshin pa drita.
Brenda vetëm 51 ditësh, hetuesit evidentuan gjithsej 1,826 dërgesa.
Nga kontrollet u sekuestruan 500 gramë kanabis, 6,000 euro para të gatshme, një automjet dhe një dron së bashku me 18 bateri që shërbenin për realizimin e dërgesave.
Një burim sindikal deklaroi për AFP-në se kjo situatë “nuk na habit”, duke nënvizuar se punonjësit e burgjeve nuk disponojnë pajisjet e domosdoshme për të luftuar këtë formë trafikimi.
Përdorimi i dronëve për dërgesa të paligjshme në burgjet e Francës ka shënuar një rritje të fortë.
Autoritetet penitenciare i thanë AFP-së në janar se gjatë vitit 2025 u konstatuan në Francë më shumë se 5,000 fluturime ose tentativa fluturimi me dronë drejt burgjeve, kundrejt më shumë se 800 rasteve të regjistruara në vitin 2024.
Sipas autoriteteve, shtimi i ndjeshëm i rasteve shpjegohet pjesërisht edhe me instalimin e detektorëve për zbulimin e dronëve.
