Një juri në Los Angeles ka vendosur që këngëtari amerikan Chris Brown të mbajë përgjegjësi për një sulm të ndodhur në pronën e tij në Tarzana, Kaliforni, duke e detyruar të paguajë 12.9 milionë dollarë dëmshpërblim për Maria Avilën, pastruesen e shtëpisë që mbeti rëndë e plagosur gjatë ngjarjes së vitit 2020.
Vendimi erdhi në përfundim të një procesi gjyqësor që zgjati dy javë, ku juria arriti në përfundimin se Brown dhe kompania e tij, Black Pyramid LLC, kishin vepruar me neglizhencë. Sipas çështjes, Avila u sulmua nga një qen bari kaukazian 90 kilogramësh, i quajtur Hades, në momentin kur po nxirrte mbeturinat nga banesa e artistit.
Të lidhura
None found
Në dëshminë e saj, Avila tregoi se sulmi i shkaktoi dëmtime të rënda, përfshirë shqyerje të mëdha të lëkurës, shpërfytyrim të përhershëm në fytyrë, humbje të pjesshme të shikimit, dëmtime nervore dhe kufizime në lëvizjen e krahut të majtë. Ajo tha gjithashtu se, për shkak të pasojave fizike dhe stresit post-traumatik, nuk ka mundur të rikthehet më në punë.
Gjatë shqyrtimit të çështjes, juria dëgjoi se Brown ishte larguar nga vendi i ngjarjes pa njoftuar shërbimet e emergjencës, duke ua lënë punonjësve të tij kujdesin për të plagosurën. Nga ana e tij, këngëtari pretendoi se kishte vepruar me këshillën e menaxherit, pasi druhej se prania e tij do të sillte vëmendje të madhe mediatike.
Brown pranoi se mbante një pjesë të përgjegjësisë, por kundërshtoi masën e dëmtimeve dhe argumentoi se edhe Avila kishte një pjesë të fajit. Ai deklaroi se kishte paralajmëruar Maria Avilën dhe motrën e saj, Patricia, që të mos dilnin jashtë pa praninë e rojeve të sigurisë, pasi qentë nuk ishin miqësorë. Të dyja gratë e hodhën poshtë këtë pretendim.
Këngëtari shpjegoi gjithashtu se qeni ishte blerë për arsye sigurie dhe mbahej nga rojet për mbrojtjen e pronës, duke përmendur rastet e shumta të përndjekjes që, sipas tij, kishte përjetuar.
Përveç shumës së akorduar për Maria Avilën, juria vendosi edhe 885 mijë dollarë dëmshpërblim për motrën e saj, Patricia, si dhe 50 mijë dollarë për bashkëshortin e Avilës, Oscar Olivo.
