Ylli amerikan i muzikës, Chris Brown, ka pranuar zyrtarisht akuzën për sulm ndaj producentit muzikor Abraham Diaw, në një incident që ndodhi në një klub nate në Londër para tre vitesh.
Të premten e 24 korrikut, këngëtari u paraqit në Gjykatën e Kurorës Southwark dhe ndryshoi deklaratën e tij të mëparshme, duke kaluar nga mohimi i akuzave në pranimin e fajësisë. Lajmi u konfirmua nga burime mediatike britanike dhe raportime të TMZ.
Të lidhura
None found
Ngjarja në fjalë daton në shkurt të vitit 2023, në klubin e njohur londinez “Tape”. Sipas pretendimeve të producentit Diaw, ai u godit me një shishe gjatë një konflikti. Pas arrestimit të tij, Brown u lirua me kusht, duke paguar një garanci prej 5 milionë paundësh.
Në seancën gjyqësore, edhe bashkëpunëtori i Brown, Omololu Akinlolu, i cili ndodhej në vendngjarje, pranoi gjithashtu fajësinë për sulm.
Të dy të pandehurit konfirmuan se kishin ushtruar ose kërcënuar me forcë të paligjshme ndaj viktimës, duke krijuar një situatë që do të shkaktonte frikë për sigurinë personale te çdo individ i arsyeshëm.
Në vijim të procesit, organi i akuzës vendosi të heqë dorë nga akuzat më serioze, përfshirë tentativën për shkaktimin e lëndimeve të rënda trupore dhe një akuzë tjetër për dëmtim fizik.
Gjykata ka njoftuar se dënimi për Chris Brown dhe Omololu Akinlolu do të shpallet më 26 tetor.
