Ambasada e SHBA-së në Tiranë ka paralajmëruar për rreziqet që lidhen me protestat e përshkallëzuara dhe përplasjet e raportuara në disa qytete të Shqipërisë.
Në njoftimin zyrtar, ambasada u bëri thirrje qytetarëve të kenë kujdes, pasi në disa demonstrata protestuesit kanë përdorur mjete ndezëse, kanë hedhur gurë dhe kanë dëmtuar prona publike e private. Paralajmërimi përfshin edhe mundësinë e bllokimit të rrugëve dhe ndërprerjes së shërbimeve.
Të lidhura
None found
Sipas ambasadës, protesta po mbahen në Tiranë, Shkodër, Durrës, Vlorë, Korçë, Kukës dhe Elbasan, kryesisht në qendrat e qyteteve dhe pranë institucioneve qeveritare. Disa prej tyre janë shoqëruar me dhunë, ndërsa demonstrata të tjera mund të zhvillohen gjatë ditëve në vijim.
Tubimet mund të shtrihen edhe në rrugët përreth, duke sjellë shtim të pranisë policore, pengesa në trafik, devijime dhe mbyllje rrugësh. Ambasada amerikane ka udhëzuar personelin e saj të mos afrohet në zonat ku zhvillohen demonstrata.
Qytetarëve u kërkohet të qëndrojnë vigjilentë, të vendosin sigurinë personale në radhë të parë, të ndjekin mediat vendase për njoftimet e fundit dhe të zbatojnë udhëzimet e autoriteteve lokale të rendit.
Parashikohet që në Shqipëri të ketë mbyllje të tjera ose reduktim të shërbimeve publike, përfshirë transportin publik, zyrat shtetërore dhe shkollat.
Ambasada këshillon shmangien e protestave, vëmendjen ndaj mjedisit përreth dhe kufizimin e shpërqendrimeve në publik, si përdorimi i telefonit apo kufjeve. Ajo rekomandon gjithashtu ndjekjen e mediave lokale, pasjen e një plani emergjence ose rruge daljeje dhe ruajtjen e një profili të ulët.
