Lëvizjes Vetëvendosje i është kërkuar nga deputetët e Partisë Demokratike të Kosovës dhe të Aleancës që të bëjë thirrjen për vazhdimin e seancës konstituive të Kuvendit të Kosovës.
Të lidhura
None found
Gjatë paraqitjes së tyre të mërkurën në sallën plenare, përfaqësuesit e dy partive pretenduan se LVV-ja po e pengon me qëllim krijimin e institucioneve të reja.
Duke folur në emër të PDK-së, deputeti Arian Tahiri deklaroi se Lëvizja Vetëvendosje, nëpërmjet Avni Deharit, i cili kryeson seancën konstituive, po e çon shoqërinë dhe vendin drejt anarkisë.
“Është një ditë që publiku dhe qytetarët e Kosovës janë duke e parë që dyert e Kuvendit po mbyllen dhe Kuvendi po bllokohet… Organizatë banditeske, e cila është e mveshur me petkun e pushtetit dhe përmes pushtetit po e çon në rendin kushtetues dhe po tenton të futë shoqërinë dhe vendin tonë në anarki”, tha ai.
Edhe deputeti i Aleancës, Besnik Tahiri, reagoi ndaj mosthirrjes së seancës konstituive të legjislaturës së njëmbëdhjetë, duke e cilësuar atë si shkelje të sovranitetit dhe të rendit kushtetues.
“Sovraniteti i takon popullit, i takon institucioneve të zgjedhura. Ne që jemi këtu jemi të zgjedhur, ndërkaq bllokimi i Kuvendit të Kosovës është cenim i sovranitetit dhe rendit kushtetues. Ne nuk do të lejojmë që në asnjë mënyrë të dhunohet e drejta e qytetarëve për të pasur institucione”, shtoi ai.
