Kosova ndodhet ende në një situatë pasigurie politike pas zgjedhjeve të parakohshme, ku krijimi i institucioneve të reja mbetet një nga pengesat më të mëdha për vendin.
Të lidhura
None found
Në këtë kuadër, vëmendja është përqendruar sërish te bashkëveprimi i mundshëm mes dy forcave kryesore politike, pas takimit të kreut të Lëvizjes Vetëvendosje, Albin Kurti, dhe liderit të Lidhjes Demokratike të Kosovës, Lumir Abdixhiku. Megjithëse bisedimet nuk përfunduan me një ujdi të qartë, sinjalet e të dyja anëve për të mbajtur gjallë komunikimin kanë ngjallur shpresë për një mirëkuptim të ardhshëm.
Pas mbledhjes, Kurti u shpreh para gazetarëve se ndihet optimist dhe beson në mundësinë e një marrëveshjeje, edhe pse takimi fillestar nuk dha rezultate të menjëhershme.
“Nuk kemi ende një përfundim apo diçka konkrete për ta ndarë me ju. Megjithatë, unë kam besim”, deklaroi Kurti.
Në këtë diskutim mori pjesë edhe ish-presidentja Vjosa Osmani, e cila synon një mandat të dytë dhe garoi në zgjedhje së bashku me LDK-në në një listë të përbashkët.
Kurti nënvizoi se me Abdixhikun dhe Osmanin u diskutua për ngritjen e plotë të institucioneve, por shtoi se afati kushtetues katërjavor për konstituimin e Kuvendit sapo ka filluar, pas certifikimit të rezultateve të 7 qershorit.
Nga ana tjetër, Abdixhiku bëri të ditur se në këtë fazë, të dyja palët ranë dakord të vijojnë komunikimin si e vetmja rrugë për të evituar zgjedhjet e reja të jashtëzakonshme.
Ai theksoi se LDK-ja kërkon një konsolidim institucional dhe një baraspeshë demokratike, ku secili aktor të kontribuojë me përgjegjësi për t’i siguruar vendit organe të forta.
E ardhmja do të tregojë nëse një kompromis i mundshëm LVV-LDK do të jetë një hap i qëndrueshëm drejt daljes nga ngërçi apo thjesht një marrëveshje e përkohshme për të shpëtuar nga zgjedhjet e parakohshme dhe për të vënë në lëvizje mekanizmat shtetërorë.
Halili: Suksesi i një bashkëpunimi LVV-LDK do të vlerësohet më shumë nga zbatimi sesa nga nënshkrimi i tij
Profesor Nijazi Halili, në një bisedë për “Bota sot”, komentoi se të dyja partitë kanë dhënë shenja të një vullneti për të gjetur një dalje dhe për të parandaluar një tjetër cikël votimesh.
“Takimi mes LVV-së dhe LDK-së tregon se ka një predispozitë për të zgjidhur bllokimin institucional dhe për të shmangur një proces të ri elektoral. Megjithatë, ky afrim nuk duhet konceptuar thjesht si një pakt teknik për ndarje detyrash, por si një përpjekje për të krijuar një stabilitet afatgjatë.”
Sipas tij, një koalicion i mundshëm do të haste vështirësi për shkak të divergjencave politike dhe programore.
Por, nëse arrihet një ujdi me themel të shëndoshë, ajo mund të sillte një klimë stabiliteti dhe funksionim normal të institucioneve.
“Një aleancë e mundshme LVV-LDK do të ndeshej me sfida të mëdha, sidomos për shkak të dallimeve në programe dhe qëndrimeve të dikurshme. Pyetja kyçe nuk është vetëm nëse mund të firmoset një marrëveshje, por nëse ajo do të ketë mbështetje të mjaftueshme politike për të funksionuar gjatë.
Një marrëveshje e tillë, nëse do të realizohej, mund të sillte paqe politike dhe një ecuri më normale të institucioneve. Por, nëse do të ishte thjesht një kompromis për t’i shpëtuar zgjedhjeve, pa një harmonizim të qartë mbi prioritetet dhe reformat, rreziku është që kriza të shtyhet e jo të zgjidhet”, shpjegoi ai.
Profesori shtoi se vlera e marrëveshjes do të përcaktohet nga aftësia për të rikthyer besimin e popullit tek institucionet.
“Prandaj, çdo bashkëpunim mes LVV-së dhe LDK-së do të gjykohet jo nga arritja e marrëveshjes, por nga kapaciteti për ta vënë atë në jetë dhe për të rifituar besimin e qytetarëve”, përfundoi Nijazi Halili për “Bota sot”.
Haziri: Bisedimet e mëtejshme LVV-LDK vështirë se do të japin fryt
Analisti politik Nexhat Haziri vlerësoi se takimi i parë mes LVV-së dhe LDK-së ishte joproduktiv, por nuk e mohoi mundësinë e zhvillimeve të reja në vazhdimësi.
Në një intervistë për “Bota sot”, ai nënvizoi rëndësinë e një ujdie mes këtyre dy forcave, duke përmendur faktin se PDK-ja dhe AAK-ja nuk kanë shfaqur interes për bashkëpunim.
“Nëse i referohemi takimit të parë mes liderëve të LVV-së dhe LDK-së, i cili nuk solli ndonjë hap konkret, mbetet për t’u parë se çfarë do të prodhojnë takimet e radhës. Kjo merr peshë edhe më shumë tani, kur gjendemi në një situatë të re, pasi PDK-ja e ka qartësuar qëndrimin se do të qëndrojë në opozitë dhe nuk interesohet as për zgjedhjen e kreut të shtetit. Pa votat e këtij subjekti, zgjedhja e presidentit ose presidentes bëhet shumë e vështirë.
Gjithashtu, refuzimi i AAK-së për t’iu përgjigjur pozitivisht ftesës së z. Kurti për t’u takuar e ndërlikon edhe më shumë procesin e përzgjedhjes së presidentit.”
Sidoqoftë, Haziri e sheh me skepticizëm mundësinë e një marrëveshjeje të suksesshme LDK-LVV, duke vënë në dukje se edhe votat e kombinuara të tyre nuk arrijnë kuorumin e nevojshëm për zgjedhjen e presidentit.
Ai përmendi edhe trazirat e brendshme në LDK dhe rrezikun e zgjedhjeve të reja.
“Rrjedhimisht, vazhdimi i bisedimeve ndërmjet LVV-së dhe LDK-së për të arritur një marrëveshje për institucionet, veçanërisht për kreun e shtetit, nuk pritet të jetë frytdhënës. Kjo lidhet edhe me gjendjen e brendshme të LDK-së, e cila po kalon kohë të vështira për shkak të përçarjeve të thella dhe thirrjeve për largimin e z. Abdixhiku.
Nga ana tjetër, z. Kurti dhe LVV-ja kanë vota të mjaftueshme për të zgjedhur kryetarin e Kuvendit dhe për të formuar qeverinë. Megjithatë, kjo nuk e nxjerr vendin nga kriza dhe nuk i plotëson institucionet pa zgjedhur presidentin. Nëse kjo dështon, vendi do të detyrohet sërish drejt zgjedhjeve të reja”, argumentoi ai.
Në fund, Haziri shtoi se posti i presidentit duhet t’i takojë opozitës, në mënyrë që të ketë gjasa për mbështetje edhe nga AAK-ja dhe PDK-ja.
“Pra, çfarëdo bisedimesh dhe marrëveshjesh mes LVV-së dhe LDK-së, sidomos për zgjedhjen e presidentit, nuk përbëjnë zgjidhje, sepse u mungojnë votat e nevojshme.
Për këtë arsye, z. Kurti duhet të jetë më pragmatik dhe të ofrojë një lëshim që posti i kreut të shtetit t’i kalojë opozitës. Një kompromis i tillë do të mund të përfshinte në proces edhe PDK-në dhe Aleancën. Kjo do të ishte formula e vetme që do të siguronte formimin e institucioneve të reja dhe stabilitetin politik, mbi bazën e një balancimi të pushteteve në vend”, përmbylli Nexhat Haziri për “Bota sot”.
