Italia synon të ruajë angazhimin e saj në fushën e sigurisë në Ballkanin Perëndimor, edhe nëse KFOR-i vendos të reduktojë praninë dhe operacionet e tij në Kosovë. Këtë e deklaroi ministri italian i Mbrojtjes, Guido Crosetto.
Të lidhura
None found
Sipas agjencisë italiane të lajmeve ANSA, deklarata u bë në Prishtinë, ku Crosetto mori pjesë në ceremoninë e ndërrimit të komandës së misionit të KFOR-it.
Ministri italian vlerësoi se Ballkani përbën një element të rëndësishëm të sigurisë së Italisë. Ai tha gjithashtu se në të ardhmen mund të shqyrtohet vendosja e radarëve në rajon, me synim mbrojtjen si të vendeve ballkanike, ashtu edhe të Italisë nga kërcënime të mundshme.
Crosetto solli si shembull raketat që goditën aeroportet e Arabisë Saudite, duke theksuar se ato ishin prodhuar nga Huthitë dhe jo nga inxhinierë të specializuar, ndërsa kishin arritur shpejtësi prej 8.500 kilometrash në orë. Sipas tij, ky rast tregon se çfarë lloj rreziqesh mund të përballojnë të gjitha kombet në të ardhmen.
Ai nënvizoi se përballë këtyre kërcënimeve është e domosdoshme ruajtja e pranisë në vendet fqinje mike, për të ndërtuar një sistem të përbashkët mbrojtjeje që mund t’u përgjigjet sfidave të tilla.
