Procesi për ngritjen e institucioneve të reja në Kosovë vijon të mbetet i bllokuar nga ngërçi politik, ndërsa përpjekjet për një ujdi mes Lëvizjes Vetëvendosje dhe Lidhjes Demokratike të Kosovës vazhdojnë të jenë në qendër të vëmendjes.
Të lidhura
None found
Albulena Haxhiu, në cilësinë e ushtrueses së detyrës së presidentes, ka dhënë më shumë hollësi rreth diskutimeve ndërmjet LVV-së dhe LDK-së. Sipas saj, në takime janë shqyrtuar disa mundësi për kapërcimin e situatës, por palët ende nuk kanë arritur marrëveshje për formimin e institucioneve.
Për këto zhvillime ka folur për “Bota sot” veprimtari shqiptar në SHBA, Agim Aliçkaj. Ai e konsideron gjendjen politike në Kosovë tejet absurde dhe thotë se, fatkeqësisht, nuk sheh ndonjë zgjidhje në horizont për bllokadën.
Aliçkaj vlerëson se qytetarët janë lodhur duke e votuar Albin Kurtin për kryeministër pa i krijuar atij mundësinë të qeverisë. Sipas tij, PDK-ja, LDK-ja dhe Aleanca, si humbëse të zgjedhjeve, po e përdorin Kushtetutën e “kompromiseve” të Ahtisaarit për ta mbajtur shtetin të bllokuar pa afat.
Në këndvështrimin e tij, nga kjo situatë përfiton organizata armiqësore Lista Srpska, të cilën ai e përshkruan si një strukturë të ngritur dhe të mobilizuar vetëm për destabilizimin dhe shkatërrimin e shtetit të Kosovës. Aliçkaj pretendon se ajo udhëhiqet hapur dhe drejtpërdrejt nga regjimi racist dhe hegjemonist serb.
Ai kritikoi gjithashtu diplomatët evropianë, duke thënë se, në vend që t’i kërkojnë opozitës ndërprerjen e bllokadave, ata janë përqendruar te fuqizimi i kësaj liste dhe po ushtrojnë presion për rikthimin në detyrë të prokurorëve armiqësorë. Sipas Aliçkajt, diplomatët nga njëra anë kërkojnë respektimin e ligjeve dhe rregullave, ndërsa nga ana tjetër i bëjnë trysni qeverisë në detyrë që ta shkelë ligjin në interes të regjimit serb në Beograd.
Duke u ndalur te mundësia e një marrëveshjeje ndërmjet LVV-së dhe LDK-së për krijimin e institucioneve, Aliçkaj tha se bisedimet e nisura pas zgjedhjeve të qershorit u zhvilluan fillimisht me seriozitet dhe ngjallën te qytetarët shpresën se këtë herë mund të arrihej një dakordim politik.
Ai i cilësoi disi optimiste deklaratat e presidentes Albulena Haxhiu për këto diskutime, por shtoi se mbetet të shihet se çfarë do të ndodhë gjatë ditëve në vijim. Megjithatë, për shkak të përçarjeve serioze brenda LDK-së, arritja e një marrëveshjeje mes dy partive i duket shumë e vështirë.
Sipas tij, pengesa kryesore lidhet me zgjedhjen e Presidentit, proces për të cilin nevojitet kuorumi i dy të tretave të deputetëve. Aliçkaj e cilësoi këtë kërkesë si pasojë të një vendimi të gabuar dhe pa kuptim të Gjykatës Kushtetuese të Kosovës, ndërsa tha se gjasat që LDK-ja t’i sigurojë 18 votat e nevojshme janë shumë të vogla.
Veprimtari paralajmëroi se një bojkot i plotë i votimit nga deputetët e LDK-së do të dëshmonte, sipas tij, se kjo parti nuk është çliruar ende nga ndikimi i oligarkëve të Kosovës dhe miqve të tyre të paguar në Amerikë.
Nëse LDK-ja e do realisht shtetin dhe nuk dëshiron të mbajë përgjegjësinë për dërgimin e vendit në zgjedhje të tjera, Aliçkaj mendon se ajo duhet t’i japë votat që mundet, edhe pa hyrë në ndonjë koalicion. Në një skenar të tillë, përgjegjësia do t’u kalonte PDK-së dhe Aleancës.
Ai tha se deputetët e këtyre dy subjekteve do të kryenin shkelje të rëndë të detyrave të tyre nëse nuk do të qëndronin në vendet e punës në Parlament gjatë votimit për Presidentin. Sipas tij, në atë rast ata do të vazhdonin të ishin përgjegjësit kryesorë për bllokimin e shtetit.
Aliçkaj komentoi edhe deklaratën e kreut të Aleancës, Ardian Gjini, se kjo parti do të befasojë me rritjen e votave në zgjedhjet e reja. Ai e quajti këtë pretendim naiv dhe pa bazë, duke thënë se Gjini është ndër ata që shpresojnë të korrin pa mbjellë asgjë.
Sipas tij, kreu i Aleancës po paralajmëron bllokada të paramenduara dhe të hartuara sipas një plani të caktuar. Aliçkaj vlerësoi se një sjellje e tillë e dëmton shtetin dhe se partia e Gjinit nuk e meriton ta kalojë pragun.
Kritika pati edhe për PDK-në, të cilën e përshkroi si të mashtruar nga lobisti serb Grenell dhe nga pro-serbi Edi Rama. Sipas Aliçkajt, kjo parti është pozicionuar haptazi për ta çuar vendin në zgjedhje, pavarësisht propozimit të Kurtit, me shpresën se drejtuesit e saj do të lirohen nga Haga dhe do të kthehen në Kosovë me “xhepa plot me vota”. Ai ngriti pyetjen se ku do t’i gjenin ato vota, edhe nëse do të liroheshin.
Duke analizuar tërësinë e zhvillimeve, Aliçkaj arriti në përfundimin se partitë që humbën zgjedhjet e fundit nuk po tregojnë interes për zgjidhjen e ngërçit. Sipas tij, ato kërkojnë vetëm justifikime për ta zgjatur pafundësisht bllokimin e shtetit, me shpresën se Albin Kurti do të largohet nga qeverisja dhe politika.
Ai e konsideron të parealizueshme këtë synim, duke theksuar se qytetarët nuk mashtrohen dhe e dallojnë se kush mban përgjegjësi për situatën. Në vlerësimin e tij, veprimet e opozitës nuk e dëmtojnë Kurtin, por vetëm shtetin.
Aliçkaj tha se vetë sjellja e pakuptimtë e opozitës po e përcakton dhe po e zgjat qëndrimin e Kurtit në detyrë. Ai shtoi se qeverisja vazhdon me kompetenca të reduktuara, çka nënkupton edhe përgjegjësi më të vogël për funksionimin e përgjithshëm të shtetit.
Sipas tij, nëse Kurtit do t’i mundësohej të qeveriste normalisht, opozita do të kishte baza më reale për ta kritikuar. Në këtë mënyrë do të krijoheshin edhe kushtet që ajo të siguronte një pozicion më të mirë në zgjedhjet e ardhshme.
Në përfundim, Aliçkaj tha se qytetarët presin nga Kurti dhe koalicioni i tij të tregohen konstruktivë e të hapur, si dhe të paraqesin propozime kompromisi, njësoj siç vepruan përpara zgjedhjeve të 7 qershorit. Sipas tij, kandidati për President duhet të jetë jopartiak, i aftë dhe me përvojë ndërkombëtare.
Ai theksoi se, nëse partitë duan të vazhdojnë të ekzistojnë dhe Kosova të ketë shtet funksional, duhet ta kuptojnë se qeverisja e këtij mandati i përket Kryeministrit Kurti, kurse Presidenca i takon popullit. Aliçkaj tha se ky është vullneti i shprehur qartë nga qytetarët dhe se, për politikanët e mençur, zgjidhja është shumë e lehtë.
“Kush e shkel vullnetin e popullit, shkel mbi rezistencën shekullore, luftën çlirimtare dhe gjakun e heronjve dhe të të gjitha viktimave të gjenocidit serb”, përfundoi Agim Aliçkaj për “Bota sot”.
