Vatra e zjarrit në fshatin Peshtan i Vogël është kthyer aktualisht në pikën më problematike, ndërsa situata vijon të rëndohet. Përparimi i shpejtë i flakëve po kërcënon drejtpërdrejt dhjetëra banesa dhe qindra rrënjë ullinj, pikërisht në kulmin e sezonit të prodhimit.
Përballë rrezikut të menjëhershëm për shtëpitë, autoritetet kanë nisur evakuimin e banorëve të zonës. Zjarri ka përfshirë sipërfaqe me pemë në prodhim të plotë, duke i shkaktuar komunitetit vendas dëme të konsiderueshme ekonomike.
Të lidhura
None found
Banorët e evakuuar, të revoltuar për humbjet, deklarojnë se përhapja e zjarrit mund të ishte shmangur nëse ndërhyrja në fazat e para do të kishte qenë më efikase. Ata pretendojnë se vonesat lejuan që flakët të dilnin plotësisht jashtë kontrollit.
Sipas banorëve, kjo nuk është hera e parë që zjarret u shkaktojnë dëme kaq të rënda. Ata kërkojnë një reagim më të fortë institucional dhe masa konkrete parandaluese ndaj katastrofave të tilla, të cilat u shkatërrojnë punën dhe mundin e shumë viteve.
