Përmbytjet katastrofike që kanë goditur Nepalin kanë shkaktuar mbi 1,000 viktima, ndërsa autoritetet raportojnë se më shumë se 3,900 persona vijojnë të jenë të zhdukur.
Të lidhura
None found
Mes personave që nuk dihet ku ndodhen janë mbi 600 punëtorë, për të cilët dyshohet se kanë mbetur të bllokuar në tunele të mbushura me baltë pranë projekteve hidroelektrike përgjatë lumit Trishuli.
Përpjekjet për gjetjen dhe shpëtimin e tyre po zhvillohen nga forcat ushtarake të Nepalit dhe Kinës, ndërsa në operacion janë përfshirë edhe specialistë nga India, Koreja e Jugut dhe Australia. Kryeministri nepalez Balendra Shah njoftoi se deri tani janë nxjerrë të gjallë 279 persona nga zonat e prekura.
Ekipet kanë nisur të furnizojnë me ajër tunelet ku mendohet se ndodhen punëtorët e humbur. Një grup shpëtimi arriti të depërtonte në një tunel që lidhet me një hidrocentral, por u largua pasi nuk konstatoi persona të mbijetuar.
Familjarët e të zhdukurve ende ushqejnë shpresën se të afërmit e tyre mund të jenë gjallë. Anushila Bhandari, gruaja e inxhinierit 33-vjeçar Aurus Bhandari, i zhdukur në një prej kantiereve, tha se dëshiron vetëm që ai të gjendet dhe të rikthehet në shtëpi.
Sipas familjarëve, mundësitë për mbijetesë nuk janë shuar, pasi tunelet mund të jenë të pajisura me sisteme oksigjeni. Sita Pandey, bashkëshortja e një punëtori që nuk është gjetur, deklaroi se ende ruan 50% shpresë se ai është gjallë për shkak të këtij sistemi.
Të afërmit kanë shprehur pakënaqësi për ngadalësinë e operacionit dhe u kanë kërkuar autoriteteve ta përshpejtojnë ndërhyrjen. “Sa më shumë kohë të duhet, aq më shumë shuhet shpresa jonë”, tha Jiban Khadka, i cili ka një familjar të bllokuar në një prej impianteve.
Inxhinieri australian Arnold Dix, që po këshillon autoritetet nepaleze për kërkimet nëntokësore, tha se ekipet po hasin pengesa serioze në përpjekje për të përcaktuar vendndodhjen e tuneleve.
Dix shpjegoi se, pasi të identifikohet pozicioni i tyre, shpëtimtarët mund të përdorin gërmime dhe shpërthime për të krijuar një kalim drejt të bllokuarve. Ai paralajmëroi se në zonë ka gurë më të mëdhenj se shtëpitë, çka e bën operacionin veçanërisht kompleks.
Një zëdhënës i Ministrisë së Shëndetësisë bëri të ditur se është identifikuar vetëm rreth 4% e 900 trupave të gjetur deri tani. Personeli mjekësor dhe vullnetarët po mbledhin mostra ADN-je nga trupat e paidentifikuar, në mënyrë që familjet të mund të konfirmojnë identitetin e tyre dhe të marrin eshtrat e të afërmve.
