Autoritetet kineze kanë paralajmëruar për rrezik të lartë nga një përmbytje tjetër në afërsi të kufirit me Nepalin, ku rrëshqitjet e dheut kanë sjellë formimin e një liqeni të ri natyror.
Të lidhura
None found
Dheu dhe shkëmbinjtë e shembur kanë ndërprerë rrjedhën e lumenjve Chhochen Khola dhe Purepu Tsangpo. Si pasojë, uji po mblidhet prapa pengesës natyrore të krijuar nga materialet e rrëshqitjeve.
Deri të premten, në liqen ishin akumuluar rreth 2.5 milionë metra kub ujë, ndërsa reshjet pritet ta rrisin më tej nivelin. Kina shqetësohet se presioni mund ta dëmtojë barrierën natyrore, duke bërë që liqeni të dalë nga shtrati dhe të shkaktojë përmbytje të reja, të shoqëruara me rrëshqitje dheu në zonat përreth.
Alarmi është dhënë vetëm disa ditë pas përmbytjes së fuqishme që goditi rajonin, duke lënë qindra viktima dhe persona të zhdukur. Shkencëtarët vlerësojnë se katastrofa mund të ketë ardhur nga shembja e një akullnaje, e cila lëshoi një masë të madhe uji dhe mbetjesh përgjatë lumit.
Për shkak të kërcënimit, disa operacione shpëtimi janë ndërprerë përkohësisht nga autoritetet kineze. Në të njëjtën kohë, ekipet inxhinierike po mbajnë nën vëzhgim të pandërprerë nivelin e ujit dhe qëndrueshmërinë e liqenit.
Monitorimi i zonës po kryhet edhe me dronë, të cilët përdoren për të zbuluar ndryshime që mund të sinjalizojnë çarjen ose shembjen e barrierës. Megjithatë, rritja e nivelit të ujit nuk pritet domosdoshmërisht të përfundojë në katastrofë. Uji mund të krijojë gradualisht një dalje natyrore nga liqeni, duke zvogëluar presionin dhe parandaluar një përmbytje të menjëhershme.
Edhe Nepali ka ndërmarrë masa parandaluese. Autoritetet kanë udhëzuar banorët të mos afrohen pranë lumenjve Bhote Koshi dhe Trishuli, pasi pengesat e mundshme në rrjedhën e tyre dhe ngritja e nivelit të ujit mund të sjellin përmbytje të tjera.
