Forcat ruse sulmuan njëkohësisht gjatë natës qytetet ukrainase Kiev, Çernihiv dhe Odesa, duke shkaktuar viktima, dëme të shumta dhe alarm te banorët.
Të lidhura
None found
Sipas Shërbimit Shtetëror të Emergjencave (DSNS), në zona të ndryshme të kryeqytetit u goditën godina banimi dhe magazina. Nga sulmet nuk shpëtuan as një spital për fëmijë dhe një shkollë, të cilat gjithashtu pësuan dëmtime.
Bilanci i raportuar ishte të paktën 13 të vdekur dhe rreth 40 të plagosur. Ministria ruse e Mbrojtjes deklaroi se për sulmet ishin përdorur armë të lëshuara nga ajri, toka dhe deti, duke pretenduar gjithashtu se ishin rrëzuar 726 dronë ukrainas.
Presidenti ukrainas Volodymyr Zelensky e lidhi humbjen e jetëve me mungesën e raketave për mbrojtjen ajrore, të cilat Ukraina i merr nga aleatët e saj perëndimorë.
“Për sa kohë Ukraina nuk ka mjaftueshëm sisteme kundër raketave balistike, Rusia nuk do të mendojë seriozisht për paqen”, shkroi Zelensky në rrjetet sociale.
Alarmet ajrore u aktivizuan në të gjithë Kievin rreth mesnatës, sipas orës lokale. Më vonë, rreth 20 raketa ruse goditën objektiva brenda qytetit, ndërsa mijëra prona mbetën pa energji elektrike dhe disa zona të rajonit të Kievit u zhytën në errësirë.
Volodymyr Zelensky njoftoi se në rajonin e Odesës dronët goditën një pikë kufitare me Moldavinë. Në rajonin e Çernihivit, objektiv i sulmit ishte infrastruktura e gazit.
“Falënderoj të gjithë punonjësit e shpëtimit, mjekët, efektivët e policisë dhe ekipet e shërbimeve të emergjencës, të cilët u kanë ardhur në ndihmë banorëve që në çastet e para”, deklaroi presidenti ukrainas.
E premtja u shpall ditë zie në nderim të personave që humbën jetën gjatë sulmeve të natës.
