Një shitës ukrainas 52-vjeçar i ka mbijetuar një sulmi me dron rus në një treg në Kherson. Sipas autoriteteve ukrainase, mjeti fluturues e ndoqi burrin përpara se të shpërthente pranë tij.
Të lidhura
None found
Në pamjet e bëra publike, civili shihet teksa sillet rreth furgonit të tij dhe kërkon të gjejë strehim, ndërsa droni FPV qëndron mbi të.
Pas disa përpjekjesh, droni goditi pranë automjetit dhe shkaktoi një shpërthim të fuqishëm. Burri mbeti gjallë, por pësoi plagë nga shpërthimi, lëndime prej copëzave metalike dhe tronditje në kokë.
Policia ukrainase bëri të ditur se 52-vjeçari nuk ishte i përfshirë në asnjë veprimtari ushtarake, por ishte një civil që tregtonte mallra në treg. Autoritetet e Ukrainës e përshkruan ngjarjen si një tjetër goditje të qëllimshme kundër popullsisë civile.
Ministri i Jashtëm i Ukrainës, Andrii Sybiha, deklaroi se sulmi në Kherson dyshohet se përbën krim lufte dhe bëri thirrje për një hetim ndërkombëtar.
Në të njëjtën kohë, sulmet në Ukrainë vazhdojnë të marrin jetë civilësh. Autoritetet ukrainase raportuan se dy fëmijë dhe një grua e moshuar u vranë në një tjetër sulm rus në rajonin e Sumy-t.
