Një varr tjetër masiv, në të cilin ndodhen mbetje mortore të viktimave të luftës së fundit në Kosovë, është gjetur sot në fshatin Jabukë të komunës së Zubin-Potokut. Lajmin e bëri të ditur ministri në detyrë i Punëve të Brendshme, Xhelal Sveçla.
Të lidhura
None found
Lokacioni i ri ndodhet vetëm 10 kilometra larg Kalludrës së Zubin-Potokut, ku më herët u zbuluan mbetje mortore në një varr masiv dhe ku kërkimet e gjurmimet janë ende duke vazhduar.
Sveçla shprehu mirënjohje për Policinë e Kosovës, njësitë përkatëse që hetojnë krimet e luftës, Agjencinë e Kosovës për Inteligjencë, Institutin e Mjekësisë Ligjore dhe Prokurorinë e Kosovës, për angazhimin në hulumtimin, hetimin dhe identifikimin e këtyre vendeve.
Sipas tij, Serbia nuk ka ndryshuar nga periudha e Millosheviqit, jo vetëm për shkak të figurave si Aleksandar Vuçiqi dhe Ivica Daçiqi.
Ai theksoi se Vuçiq ishte numri dy i Sheshelit, Daçiq numri dy i Millosheviqit, ndërsa Vulin numri dy i Mira Markoviqit. Sveçla shtoi se të tre vazhdojnë të jenë në pushtet në Serbi, duke vlerësuar se ky shtet ka mbetur i pandryshuar si në formë, ashtu edhe në përmbajtje.
Ministri në detyrë deklaroi gjithashtu se Serbia, nga njëra anë, nuk pranon të ofrojë të dhëna për personat e zhdukur dhe të marrë me dhunë, ndërsa, nga ana tjetër, kërcënon e burgos qytetarët e saj që ndihmojnë në zbulimin e këtyre varreve.
Ai tha se Serbia, përmes memorialeve, madhëron edhe brigada si ajo 37, pjesëtarët e së cilës janë përgjegjës për shumë masakra të kryera në Kosovë.
Sveçla u bëri thirrje partnerëve ndërkombëtarë që ta dënojnë dhe ndëshkojnë rëndë këtë sjellje të Serbisë. Sipas tij, pa një reagim të tillë, jo vetëm që çdo përparim drejt drejtësisë do të bëhet i pamundur, por Serbia do të vazhdojë ta rrezikojë çdo ditë paqen në Ballkanin Perëndimor.
Pavarësisht kësaj, ai nënvizoi se institucionet mbeten të palëkundura dhe të përkushtuara për të kërkuar në çdo pëllëmbë, me synimin që të zbardhet fati i secilit person të vrarë apo të zhdukur nga shteti serb gjatë luftës së fundit në Kosovë dhe që çdo kriminel përgjegjës për krimet e asaj kohe të dalë para drejtësisë.
