Avokati Tomë Gashi ka shprehur kundërshtim të fortë ndaj idesë së rikthimit të zyrtarëve serbë, të cilët u tërhoqën nga detyra në institucionet kosovare gjatë vitit 2022.
Të lidhura
None found
Sipas tij, largimi i rreth 600 pjesëtarëve të policisë dhe një numri gjyqtarësh e prokurorësh të komunitetit serb nuk ishte vullnetar, por i diktuar nga Beogradi zyrtar me synim minin e strukturave shtetërore të Kosovës.
Gashi i ka quajtur të papranueshme zërat që mbështesin rikthimin e tyre pas kaq vitesh, duke argumentuar se braktisja e punës nuk mund të shpërblehet me riformësim, pasi kjo në thelb godet parimet e një shteti ligjor.
Në një postim të gjatë, ai përdori një ton të ashpër për të pyetur opinionin publik: “A jeni tranu a?”.
Ai rikujtoi se vala e dorëheqjeve erdhi si pasojë e vendimit të kryeministrit Albin Kurti për të zbatuar masën e reciprocitetit ndaj targave të automjeteve. Sipas Gashit, ky veprim i Kurtit, që ndalonte hyrjen e makinave me targa simbole të Serbisë, ishte një akt mbrojtjeje i sovranitetit, diçka që liderët e mëparshëm nuk e kishin bërë.
Avokati thekson se pas katër vjetësh nga dorëheqjet, të njëjtët individë, bashkë me disa gjyqtarë e prokurorë, tani kërkojnë të rikthehen në punë. Gashi nënvizon se kjo lëvizje e re, gjithashtu e orkestruar sipas tij nga Serbia, synon të dobësojë më tej Republikën e Kosovës, të cilën ata nuk e respektojnë.
Ai e mbylli reagimin e tij duke sulmuar ashpër ata që promovojnë një gjë të tillë, duke i krahasuar me një dëshmitar të prokurorisë në Hagë në procesin kundër ish-presidentit Thaçi, dhe duke ngritur pyetjen retorike se si dikush që mungon katër ditë në punë humbet të drejtën, e jo më ata që e braktisën detyrën për katër vjet.
