Një prej pjesëmarrësve në protestën e vijueshme prej 45 ditësh përballë godinës së Kryeministrisë, ku kërkohet largimi i Edi Ramës nga pushteti, ka hedhur një paralele të ashpër mes tij dhe presidentit të Bjellorusisë, Aleksandër Lukashenko.
Sipas aktivistit, qëndresa e pandërprerë qytetare ka zbuluar atë që ai e cilëson si një stil qeverisjeje të ngjashëm me regjimet autokratike. “Këto 45 ditë kanë qenë të pabesueshme. Kjo lëvizje ka goditur rëndë korrupsionin qeveritar. Pjesëmarrja masive e të rinjve dhe e gjithë popullsisë e ka rrënuar imazhin e kësaj qeverie të kalbur më shumë se çdo herë tjetër,” deklaroi ai.
Të lidhura
None found
Ai theksoi gjithashtu se protesta ka dëmtuar seriozisht figurën që Rama, sipas tij, ka projektuar në skenën ndërkombëtare.
“Qëndresa jonë paqësore 45-ditore ka bërë të mundur që t’i shqyejmë maskën këtij kryeministri, i cili sa herë dilte jashtë shtetit përpiqej të shitej si një lider inovator, që kishte rregulluar çdo gjë dhe Shqipëria po përparonte. Brenda këtyre 45 ditëve, i dëshmuam Evropës e më gjerë se ai nuk është aspak një udhëheqës vizionar, por një Lukashenko i dytë. Tamam si Lukashenko, i cili ka me dekada në krye dhe e justifikon qëndrimin e tij me votën popullore, edhe Rama ka ngritur një mekanizëm autokratik për të nënshtruar popullin, ku një pakicë privilegjohet në dëm të shumicës,” përfundoi ai.
