Franca ka prerë biletën për një tjetër gjysmëfinale të Kupës së Botës, pasi në çerekfinale mposhti Marokun me rezultatin 2-0. Pas suksesit, një nga temat kryesore ishte edhe situata fizike e Kylian Mbappes.
Të lidhura
None found
Skuadra e Didier Deschamps hasi vështirësi ndaj Marokut, sidomos gjatë pjesës së parë, kur portieri Bono priti edhe penalltinë e goditur nga Mbappe. Megjithatë, francezët zhbllokuan sfidën në fraksionin e dytë, ku Mbappe realizoi në minutën e 60-të, ndërsa Ousmane Dembele shënoi në minutën e 66-të.
Pas përfundimit të takimit, Deschamps komentoi edhe daljen nga loja të kapitenit të Francës, i cili u zëvendësua 13 minuta para fundit të ndeshjes.
“Kyliani pati pak probleme me kyçin e këmbës, ndjeu pak dhimbje. Manu Koné mori një goditje në gju dhe kishte edhe shqetësime në bark. Por Warren Zaïre-Emery hyri dhe luajti shumë, shumë mirë. Të gjithë duhet të jenë të gatshëm. Edhe ata që nuk luajnë janë pjesë e rëndësishme e ekipit”, u shpreh Deschamps.
Trajneri francez theksoi se është i lumtur që ekipi i tij ka mbërritur në gjysmëfinale të Kupës së Botës për herë të tretë rresht.
“Mendoj se është diçka e madhe që jemi në gjysmëfinale për herë të tretë radhazi. Ndoshta duket normale, por nuk është e tillë. Kam lojtarë të jashtëzakonshëm. Sot ishte një ndeshje shumë e vështirë”, tha ai.
Deschamps ndaloi edhe te mënyra si reagoi Mbappe pasi humbi penalltinë gjatë ndeshjes.
“Kur humb një penallti dhe nuk i shfrytëzon rastet, ia vështirëson vetes. Kyliani reagoi shumë mirë dhe shënoi golin. Jemi aty ku dëshironim të ishim. Tani duhet të rikuperohemi dhe të përgatitemi për kundërshtarin e radhës”, shtoi trajneri i Francës.
Në gjysmëfinale, Franca do të përballet me fituesin e çiftit Spanja-Belgjika, ndërsa Deschamps nënvizoi se skuadra mbetet e fokusuar te synimi i saj kryesor, për të avancuar sa më shumë në këtë Botëror.
“Futbolli krijon emocione dhe ne i ndajmë ato me tifozët. E dimë që ka shumë entuziazëm në Francë, por ne duhet të qëndrojmë të përqendruar. Ky është një hap i rëndësishëm, por jemi ende në gjysmëfinale”, përfundoi Deschamps.
