Vendimi i qeverisë shqiptare për të mbuluar me 4.56 milionë dollarë koncertin e reperit amerikan Kanye West ka ngjallur interes të madh në mediat ndërkombëtare.
Pas Reuters, edhe NBC News i ka kushtuar vëmendje kësaj çështjeje, duke pasqyruar debatin e krijuar nga përdorimi i fondeve publike për organizimin e eventit.
Të lidhura
None found
Në shkrimin e NBC News thuhet se kryeministri Edi Rama e ka mbrojtur alokimin e 4 milionë eurove, duke sqaruar se ato synonin të shmangnin anulimin e koncertit dhe dëmtimin e imazhit të Shqipërisë.
“Ne akorduam 4 milionë euro në momentin e fundit për të shmangur turpërimin e Shqipërisë në sytë e gati 25 mijë vizitorëve të huaj nga 80 vende, të cilët tashmë kishin blerë bileta”, citohet Rama nga NBC News.
Sipas kryeministrit, eventi i parashikuar për më 11 korrik pranë Tiranës mund të sjellë të paktën 100 milionë euro të ardhura për ekonominë shqiptare, falë shtimit të rezervimeve në sektorin e turizmit.
NBC News rikujton gjithashtu se Kanye West, i njohur edhe si Ye, ka qenë më herët në qendër të polemikave ndërkombëtare për deklarata që u interpretuan si lavdërime ndaj Adolf Hitler dhe për përdorimin e simboleve naziste. Sipas medias amerikane, artisti më vonë ka kërkuar falje për disa prej këtyre qëndrimeve.
Artikulli vëren se vendimi i qeverisë shqiptare ka shkaktuar reagime të shumta edhe në rrjetet sociale, ku një pjesë e përdoruesve e kanë kundërshtuar përdorimin e parave publike për këtë koncert.
Po ashtu, NBC News raporton se Shqipëria prej më shumë se një muaji po përballet me protesta të përditshme në Tiranë. Sipas medias amerikane, demonstratat nisën pas kundërshtimeve ndaj projektit të resortit luksoz të lidhur me Jared Kushner dhe më pas u zgjeruan me akuza për korrupsion ndaj qeverisë dhe kërkesa për dorëheqjen e kryeministrit Rama, akuza që ai i ka mohuar.
