Një situatë alarmante u regjistrua mëngjesin e së martës në New York, ku një projekt i madh banimi pranë Terminalit Grand Central u përball me rrezik shembjeje, duke detyruar evakuimin e punëtorëve dhe të godinave përreth.
Të lidhura
None found
Njoftimi për incidentin mbërriti në Departamentin e Zjarrfikësve të New York-ut (FDNY) pak përpara orës 08:00, pasi në ndërtesën me adresë 235 East 42nd Street u raportua rënie tullash. Kjo godinë, e cila më parë ishte selia e kompanisë farmaceutike Pfizer, po përshtatet aktualisht në një kompleks rezidencial me mbi 1,600 apartamente.
Departamenti i Ndërtimit bëri me dije se një zyrtar i sigurisë kishte evidentuar dëmtime serioze në një tra metalik në katin e 21-të, çka shtoi dyshimet mbi qëndrueshmërinë e strukturës.
Nga ana tjetër, Departamenti i Zjarrfikësve deklaroi se dy kolona mbajtëse brenda ndërtesës kishin nisur të përkuleshin, ndërsa në disa prej kateve të sipërme ishin vërejtur shenja fundosjeje.
Si masë sigurie, punëtorët u larguan menjëherë nga kantieri, ndërsa autoritetet urdhëruan edhe zbrazjen e dy ndërtesave ngjitur, në adresat 225 dhe 221 East 43rd Street.
Plani i këtij projekti parashikon kthimin e ish-kompleksit të Pfizer në një zonë moderne banimi me më shumë se 1,600 apartamente, ndërsa përmbyllja e punimeve është parashikuar për vitin 2027.
Nga kjo ngjarje, fatmirësisht, nuk pati persona të lënduar. Autoritetet ndërkohë po vazhdojnë hetimet për të zbardhur shkaqet e dëmtimeve dhe për të verifikuar sigurinë strukturore të godinës.
