Shqipëria ka vijuar të regjistrojë rritje të aktivitetit turistik, ndërsa muaji maj solli një ritëm edhe më të lartë. Të dhënat e publikuara nga INSTAT tregojnë se gjatë majit 2026 në vend hynë mbi 1.1 milion shtetas të huaj, duke shënuar një rritje prej 15,9% në krahasim me të njëjtin muaj të vitit të kaluar.
Në tërësi, numri i hyrjeve të shtetasve shqiptarë dhe të huaj shkoi në 1.880.161, ose 12,2% më shumë. Po ashtu, edhe daljet pësuan rritje me 8,9%, duke arritur në 1.802.626.
Të lidhura
None found
Rritje pati edhe te lëvizjet e shtetasve shqiptarë. Gjatë muajit maj, në Shqipëri hynë 736.566 shtetas shqiptarë, që përkthehet në 6,9% më shumë se në maj 2025, ndërsa daljet e tyre u zgjeruan me 3,5%.
Nga ana tjetër, shtetasit e huaj që dolën nga vendi arritën në 1.066.831, duke rezultuar 12,9% më shumë në terma vjetorë.
INSTAT bën të ditur se afro 98% e të huajve që hynë në Shqipëri gjatë majit e kishin udhëtimin për arsye personale, përfshirë pushimet, vizitat te familjarët apo transitin. Krahasuar me një vit më parë, kjo kategori është rritur me 16,4%.
Në ndryshim nga kjo prirje, hyrjet për motive biznesi dhe profesionale kanë shënuar një tkurrje prej 5,6%.
Evropa vijon të mbetet burimi kryesor i turistëve për Shqipërinë. Rreth 70% e vizitorëve nga kontinenti vijnë nga vendet e Evropës Jugore, ndërsa 12% nga Evropa Perëndimore.
Për periudhën e pesë muajve të parë të vitit, vendi priti rreth 3,71 milionë shtetas të huaj, ose 8,2% më shumë se gjatë së njëjtës periudhë të vitit 2025.
