Milani do të harrojë sa më shpejt eleminimin nga Europa Lague pasi në kampionat e pret një transfertë shumë e vështorë ndaj Fiorentinës.
Trajneri Stefano Pioli doli sot në konferencën e zakonshme për shtyp, ku tha se skuadra e tij ka dalë më e bindur në aftësitë e veta, pas ndeshjes me Manchester United dhe se nesër pret një tjetër performancë pozitive.
“Eliminimi sigurisht që djeg, veçanërisht pasi ke bërë një ndeshje të mirë, si ne ndaj Man. United. Megjithatë nga kjo ndeshje dalim më të fortë dhe më të bindur për aftësitë tona, por njëkohësisht të vetëdijshëm që në nivele të lart atë ndëshkon qoftë edhe një gabim i vetëm. Tani mendojmë për ndeshjen me Fiorentinën, një sfidë e vështirë, por që duam të marrim maksimumin”, u shpreh Pioli.
Zlatan Ibrahimovic u rikthye ndaj Manchester United dhe luajti disa minuta, ndërsa nesër në Firenze, Pioli ka planifikuar ta hedhë në fushë nga minuta e parë. Tekniku kuqezi pranon momentin e vështirë që po kalon Calhanoglu dhe shprehet se Bennacer do të niset sërish nga pankina.
“Nuk e di nëse i ka 90 minuta në këmbë, por nesër Ibra do ta nisë ndeshjen nga minuta e parë pasi prezenca e tij është mjaft e rëndësishme për moralin e ekipit. Bennacer ka vetëm një javë që kryen seanca të plota, ndaj nesër do ta nisë nga stoli dhe do të luajë vetëm nëse kemi nevojë për të. Calhanoglu ka pasur probleme fizike, që nuk po e lejojnë të rikthehet në maksimum, por të gjithë e presim, pasi është një pikë e rëndësishme e formacionit tonë”, tha Pioli./albeu.com/
