Ushtria amerikane tha të mërkurën se Forcat e Komandës Qendrore kryen një sulm në Irak, duke vrarë një komandant të grupit Kataib Hezbollah, i cili sipas njoftimit të Komandës Qendrore ishte përgjegjës për planifikimin dhe pjesëmarrjen e drejtpërdrejtë në sulmet ndaj forcave amerikane në rajon.
Sipas njoftimin në platformën X ishte në përgjigje të sulmeve ndaj ushtarëve amerikanë.
“Për momentin nuk ka të dhëna për pasoja të tjera ose viktima civile”, thotë Komanda Qendrore.
Sulmi me dron në Bagdad, kishte në shënjestër Wissam Mohammad al-Saadin, komandant i lartë i grupit militant të mbështetur nga Irani, i tha Zërit të Amerikës një zyrtar amerikan.
Sulmi vuri në shënjestër një makinë në kryeqytetin irakian të mërkurën në mbrëmje, duke vrarë tre anëtarë të grupit militant Kataib Hezbollah, përfshirë komandantin e lartë, thanë zyrtarët amerikanë.
Sulmi ndodhi në një rrugë kryesore në lagjen Mashtal në Bagdadin lindor.
Goditja vjen mes tensioneve në rajon dhe disa ditë pasi ushtria amerikane ndëmori një sulm ajror kundër dhjetëra objektivave në Irak dhe Siri të përdorura nga milicitë e mbështetur nga Irani dhe Garda Revolucionare iraniane, si kundërpërgjigje ndaj një sulmi me dron që vrau tre trupa amerikane në Jordani në fund të janarit.
Shtetet e Bashkuara kanë fajësuar Rezistencën Islamike në Irak, një koalicion i gjerë grupesh militante të mbështetura nga Irani, për sulmin në Jordani dhe zyrtarët kanë thënë se mendojnë se është në veçanti Kataib Hezbollah që e udhëheq atë.
Rezistenca Islamike në Irak ka marrë shpesh përgjegjësinë për sulme ndaj bazave që strehojnë trupat amerikane në Irak dhe Siri ndërsa vazhdon lufta Izrael-Hamas, duke thënë se po hakmerret për mbështetjen e Uashingtonit ndaj Izraelit në luftën në Gazë, që ka vrarë 27,707 palestinezë, sipas Ministrisë së Shëndetësisë në territorin e drejtuar nga Hamasi.
