Maqedonia e Veriut të shtunën ka regjistruar 21 viktima me COVID-19 dhe 1,913 të infektuar, ka bërë të ditur Ministria e Shëndetësisë.
Rastet e reja me koronavirus dolën pas testimit të 7,219 mostrave.
Viktimat janë: shtatë në Shkup, tri në Strumicë, nga dy në Tetovë, Ohër dhe Manastir si dhe nga një në Kumanovë, Gostivar, Strugë, Koçan dhe Probishtip.
Numri i përgjithshëm i viktimave ka arritur në 8,196 dhe shumica prej tyre janë regjistruar në Shkup.
Sipas të dhënave të Institutit të Shëndetit Publik, 78 për qind e viktimave ishin të pavaksinuar kundër koronavirusit.
Sa i përket të infektuarve, nga 1,913 rastet e reja, 808 janë regjistruar në Shkup, 148 në Manastir, ndërsa numër më i vogël në 31 qytete tjera.
Aktualisht, në Maqedoninë e Veriut raste aktive janë 20,250.
Që nga paraqitja e pandemisë, me COVID-19 janë diagnostikuar mbi 250,000 persona.
Përkundër rritjes së numrit të viktimave dhe infektimeve në rritje, interesimi për vaksinim kundër koronavirusit mbetet i ulët, bazuar në të dhënat e Ministrisë së Shëndetësisë.
Mbi 862,000 persona janë imunizuar me dy doza të vaksinës, ndërsa numri i përgjithshëm i vaksinave të aplikuara sillet në rreth 1.7 miliona vaksina.
Për shkak të masave të reja për mbrojtje nga pandemia, qytetarët e Maqedonisë së Veriut nga dita e shtunë në Kosove nuk mund të hyjnë me pa pasur certifikatë për tri doza vaksinash apo dy doza dhe test negativ PCR.
Ky vendim ka shkaktuar reagim të shumta në rrjetet sociale nga qytetarët e Maqedonisë së Veriut, të cilët e vlerësojnë si masë shtrënguese dhe pengesë për lëvizje të lirë.
Kanë reaguar edhe zyrtarë shëndetësorë duke e vlerësuar vendimin të panevojshëm në kohën kur dy vendet kanë situatë të njëjtë epidemiologjike.
“Kufizimi i lëvizjes mes Kosovës dhe Maqedonisë epidemiologjikisht s’ka asnjëfarë peshe për momentin. Situata epidemiologjike, në dy vendet është lartë, poshtë e njëjtë…Me shumë vështirësi dhe mezi e bëmë hapjen e kufirit, pas kufizimeve të para që ishin vendosur në fillim të pandemisë.
Një vendim i tillë i kufizimit të lëvizjes së lirë të njerëzve tanë, kur gjithë bota fillon t’i tërheqë kufizimet dhe certifikatat, do reflektojë në vështirësi të panevojshme në planin ekonomik, social, shpirtëror”, ka reaguar në Facebook, Ilir Hasani, ish-zëvendësministër i Shëndetësisë, njëherësh zyrtar i Bashkimit Demokratik për Integrim./ REL
