Neymari është dërguar përpara Gjykatës së Lartë të Drejtësisë Sportive (STJD) në Brazil dhe mund të përballet me masa të rënda disiplinore për shkeljen e të ashtuquajturit “rregulli Vinicius Junior”.
Futbollisti i Santosit do të dalë para organit disiplinor të mërkurën, më 28 tetor, për të dhënë shpjegime mbi incidentin e regjistruar të shtunën në përballjen me Bahian, të vlefshme për kampionatin brazilian.
Të lidhura
None found
Përplasja ndodhi gjatë pushimit të ndeshjes, kur sulmuesi brazilian u përfshi në një debat me Rodrigo Nestor.
Neymari e mbuloi gojën me dorë gjatë konfliktit, por pas verifikimit të pamjeve nga sistemi VAR, arbitri Savio Pereira Sampaio i tregoi kartonin e kuq.
Prokuroria e ka referuar rastin te neni 191, që parashikon një gjobë nga 100 deri në 100 mijë realë brazilianë për shkeljen e rregullave të një organizate sportive.
Gjithashtu, ndaj futbollistit është kërkuar zbatimi i nenit 258 të kodit disiplinor, i cili lidhet me shkeljet e disiplinës dhe etikës sportive.
Sipas këtij neni, dënimi mund të jetë pezullim nga një deri në gjashtë ndeshje.
Ndërkohë, Neymar nuk do të jetë në dispozicion të Santosit për sfidën e ardhshme ndaj Bragantinos, e planifikuar të hënën. Ai e humbet këtë takim pasi kundër Bahias mori kartonin e tretë të verdhë në kampionat.
