Kryeministri i Republikës së Kosovës, Albin Kurti, zhvilloi sot një takim me Hekuran Nikçin, kryesues i Bordit të Drejtorëve të Agjencisë Kosovare të Privatizimit (AKP). Diskutimet u përqendruan te administrimi dhe ruajtja e aseteve të ndërmarrjeve shoqërore, çështjet pronësore ende të pazgjidhura dhe masat që duhen ndërmarrë për përfundimin e mandatit të Agjencisë.
Të lidhura
None found
Sipas Zyrës së Kryeministrit, një pjesë e rëndësishme e bisedës iu kushtua pronave të ndërmarrjeve shoqërore të Kosovës që ndodhen në Serbi. Në takim u nënvizua domosdoshmëria e identifikimit, dokumentimit dhe mbrojtjes së të drejtave pronësore për këto pasuri.
Palët diskutuan edhe për zbatimin e paplotë të Marrëveshjes për Kadastrin, e nënshkruar në Bruksel më 2 shtator 2011. Përmes kësaj marrëveshjeje, Serbia ishte zotuar t’ia dorëzonte Kosovës dokumentacionin kadastral të marrë prej saj. Megjithëse Bashkimi Evropian ka ofruar mbështetje financiare, përfshirë një projekt me vlerë rreth 2 milionë eurosh për zbatimin e marrëveshjes, Serbia ende nuk i ka përmbushur të gjitha detyrimet. Kjo situatë, sipas njoftimit, e komplikon zgjidhjen e problemeve pronësore dhe garantimin e sigurisë juridike mbi këto prona.
Gjatë takimit u shqyrtuan edhe ndryshimet ligjore dhe institucionale që nevojiten për përmbylljen e punës së AKP-së dhe transferimin e aseteve përkatëse te Fondi Sovran i Republikës së Kosovës. Ky proces synon përmirësimin e administrimit të pasurisë publike dhe përdorimin e saj për zhvillimin ekonomik të vendit.
Në këtë kuadër, u diskutua edhe Ligji për Fondin Sovran, i miratuar nga Kuvendi i Republikës së Kosovës në dhjetor të vitit 2023, por që prej gati tri vitesh pret vendimmarrjen e Gjykatës Kushtetuese. Për shkak të mungesës së një vendimi përfundimtar, ligji nuk ka hyrë në fuqi dhe reforma për ndryshimin e mënyrës së administrimit dhe zhvillimit të aseteve shtetërore nuk ka mundur të zbatohet.
Zyra e Kryeministrit bëri të ditur se Albin Kurti theksoi nevojën për vijimin e angazhimit institucional në mbrojtje të pasurisë së Republikës së Kosovës, adresimin e çështjeve të hapura pronësore dhe avancimin e reformave për një administrim të përgjegjshëm, transparent dhe në interes të publikut.
